Aviseu pourfitabl d’er Verdér ha d’en ol grechénion eit réglein ou buhé

Eus Wikimammenn
Sauter à la navigation Sauter à la recherche


AVISEU POURFITABL D'ER VERDÉR.


Ha d’en ol grechénion eit réglein ou buhé.


Act en Oræson.


BOUT e zou deu sort oræson, ré a vêg, ré a galon. En oræson a vêg eit bout mad, e zeli sehuel ag er galon ha bout tuemmet guet caranté er galon : er sort oræson-zé e zou hanhuet ordinæremant Pedenneu. En oræson a galon, eit bout mad, n’en dès quet dobér erbet a secour er bêg, deusto neoah ma ellér laret mar a guir a vêg, trema vér doh hé gobér ; er sort oræson-zé e zou hanhuet ordinæremant Méditation ; de laret-é, reflexioneu carantéus groeit guet chongeu er speret ha guet caranté er galon. Ret-é pedein a vég, a p’en dé hun bêg, hun ol squêndeu hac ol hun horf donæzoneu a vadeleah Doué hun hrouéour, hac eit discoein en exampl vad d’hun nessan. Ret-é pedein a speret hac a galon, a vihannoh hun pedenneu a vêg hun annéou, èl ma annéhant er vugalé ; hun speret e zeï de vout paressus, hac hun halon de vout ponnér, ha ne chommou guenemb meit er gloren pé en dianvés ag en devotion, ha memb ag er grecheneah. Amen èl él livreu aral, oræson e senefi principalemant Méditation.

N’en dès nitra a vrassoh conséquance é buhé ur hrechén eit er pratiq ag en oræson, pé en accustumance a obér oræson. Hi é hun sàu d’en Nean, hun distag a zoh en doar, hac hun joént doh Doué ; hi e ra demb tanhouat dré avance en heurustæt en dès er Sænt ér Baraouis. Mæs, allas ! gloéüe bras é en exercice ag en oræson, deusto ma paris bout stanc. Hilleih a dut e gonz ag en oræson, hilleih a dut abil en dès scrihuet ar guement-cé ; er Govézerion hé recommand, d’en ineanneu ; mæs gùir-é neoah penaus é mesq un nombr bras a dut e chonge bout dueah doh en oræson, n’en dès quet calz e avance én exercice spirituél-men. Rac n’en dès meit er grechénion e labour guet courage de fortifiem ou squêndeu e zou capabl de danhouat Doué én oræson. Hun speret e zou quer scan, poén en dès doh hum arrestein ér gontamplation ar en treu spirituel e zesq demb er fé ; é contrel é ma perpet é clasq ridec d’en treu tamporel e blige pé e zisplige d’emb ar en doar, ma n’hum breparamb d’en oræson dré er mortification, de laret-é, é verhuel d’er bed.

Mæs deusto ma cavér difficultéeu én oræson, ne zeliér quet eit en dra-zé hé abandonnein, rac abandonnein en oræson, e zou abandonnein er moyant hac er binhuic jaujaplan de ouni ha de zastum en ol vertuyeu ; hémb en oræson n’éellér quet arrihue bet er berfection, a pe n’en dé quet volanté Doué rein demb é græceu revé en ordinær, meit a p’ou goulennamb dré ur beden vad. En oræson é er squél mystérius-hont en doai discoeit en Eutru Doué d’er Patriarche Jacob ; dré er squél-zé é teli en ineanneu montein hemb cesse bet trôn ou Hroéour. Hum hroeit enta doh en oræson, mem berdér quaih, câret en exercice spirituel-zé, rac a vihannoh n’éellehet jamæs gouni na dastum er vertuyeu, nac hou pout guet Doué er burtæt a galon.

Ne zesquein quet deoh amen er fæçon d’obér oræson. Hui er havou él livr méditationeu pé réflexioneu, é breton Gùénet, él livr Aviéleu, é buhé er Sænt, ha gùel hoah én introduction d’er vuhé devot. Mé larou hemp quin deu pé tri guir, 1.° E commancér en oræson dré hum laquat é presance en Eutru Doué, hac é oulen secour guet-ou ; 2.° Nezé é chongér son ér péh e fal deoh méditein, revé ma hoès ean leinnet pé cleuet leine, pé revé ma tegasse en Eutru Doué chonge deoh ; ret-é troein ha distroein er chongeu a hou méditation én hou speret guet ou ol circonstanceu ; de laret-é, ou honsiderein a guement tu zou ; 3.° Guet ur garanté vras doh digueor hou calon d’en hoant crihue d’hé gober ér mod ma uélet é fal gobér ; 4.° goulen secour guet Doué dré intercession er Uéries hac er Sænt ; 5.° En trugairécat ag er chongeu mad en dès degasset deoh ; 6.° Ha chongeal é quement-cé liès durand en dè. Sant Françæs a Sales e hanhue en deuéhan articl-men er boquet spirituel.

Goulennet guet hou Covezour penaus é teliet hum gomportein : rinquein e ramb en dout ur honduyour én un hènt é péhani é homb dal. Hum arrestet ér méditation, nameit a gùélet e rehoh sclér é vehoh tennet guet er Speret-Santel d’ur fæçon aral a orsæson ; ha mar hum rantet fidel, en Eutru Doué e zei én hou calon guet mui a abondance ; hac én hou lausquehai ér stad-cé durand hou puhé, hou condition e vehai just quen avantajus, rac avancein e rér assès a pe héliér volanté Doué.

Mæs ret-é bout fidel ha dalhabl d’hum aquittein ag en exercice spirituel-men ; ne fal quet bout haval doh certæn tud, péré ne rant oræson, meit a pe sour guet-ai, revé ou himur. Hou pet enta hou ç’amzér réglet muihan ma ellehet, aveit gobér méditation. Er mitin-é en amzér jaujaplan, a balamort ma vai er speret hac er galon liproh ha goulioh a tracassereah ér bed, ha ma vai gùel ol en deuéh goudé un exercice quer pourfitabl. Queméret un ær, pé un hantér-ær, pé d’er bihannan ur hart-ær d’obér hou ç’oræson, revé avis hou Covezour ; de greis-dé ha de noz, hum examinet ar hou fidélité de viret er vertu pé de zihoal doh er vince e zou bet er matiér a hou méditation de vitin, revé er résolutioneu hoa poai groeit nezé.

Ne glasquet na doustér na consolation én oræson ; abandonnet ol quement-cé étré deorn en Eutru Doué, e ra pé e refus revé ma plige guet-ou. En distractioneu pé chongeu digampen e zeï én hou speret scan durand hou ç’oræson, ne vireint quet doh t’hi a vout mad, ma n’en doh dehai dré hou faut, ha mar sortiet ag en oræson humploh, mortefiettoh, ha disposettoh d’obér volanté Doué.

A p’en dès hun Salvér gourhemennet demb én Aviel pedein attàu hemb scuéhein jamæs én exercice santel-zé, hou pet sourci bras de chongeal hemp cesse é hoh é presance en Eutru Doué. Er chonge carantéus ha dalhabl a bresance en Eutru Doué e zou ur beden continuel a speret. Ne fal quet eit en drazé derhel bandet ha gênet er speret ; gùel é assaï derhel dré gair hun sel a speret ar un Doué presant dirac omb, é quement-tra crouéet e uél deulegat hun horf, revé er sclerdér ag er fé. Quement-cé e hanhuèr hum zerhelquêrhet é presance en Eutru Doué. Er Sænt er groai, hilleih er groa hoah, en dra-zé e zou unan ag en articleu a règl el Leannéset ag er Visitation. En accoursemant-cé hou talhou én ur respet bras eit majesté en Eutru Doué, hac e virou dohoh a obér nitra e ellehai offancein é zeulegat infinimant pur, hac open e reï deoh nerh de bratiquein en ol vertuyeu, èl ma ra sel ur mæstr courage d’é serviterion d’obér ou devér.