Diou voundrask a zo e’n ti
Hag a ra d’an oll avi ;
Eun drugar eo ho c’hlevet
E sutal e’n ho c’haouet,
Unan a zo da Jozon
Ag eben ’zo da Zelton.
Eun devez hini Jozon
A ziruillaz d’an traon ;
He morzad a voue torret
Hag e chommas mac’hagnet.
Var lerc’h eun henveleb lamm
Eo bet lezhanvet gar-gamm.
Eun deis all hini Selton
Hon lakeas oll e kaon ;
Astennet var he flanken
Oa var nez rei e c’hroc’hen,
Abaoue ’r seurt agsidant,
N’her galver nemet droug-sant.
Mez pehini ar vella ?
An dalc’h a goummans ama :
Gar-gamm eo, ervez Jozon,
Droug-sant eo, ervez Selton.
Ha bemdez e sao glabouz
Divar benn an daou labouz.
Sell eta, sell mad, Selton,
Ouz gar-gamm, eme Jozon,
Eun doen rouz va he choug
Ha marellet e gouzoug.
Anez m’eo torret e garr
Sûr ne gavjed ket e far.
Sell kentoc’h, sell mad, Jozon,
Ous droug-sant, eme Selton :
Pe gel lemm eo e lagad
Pe ger skanvik eo a droad ;
Daouzek all a da hini
Ne dostaffent ket oud-hi.
Selaou ! selaou mad, Selton,
Ouz drouk-sant, eme Jozon :
Mouez va hini ’ zo ken drant
Ha mouez eur c’hloc’hik arc’hant ;
He zutaden zo ken flour
Ha ma z’eo hiboud an dour.
An dra-ze, paour keas Jozon,
N’eo netra, eme Selton ;
Selaou brema va hini ;
Houma ’vad a sko var-n-hi ;
Neuz ket unan, e Bro-C’hall,
Hag a sutfe ker brao all.
Hag e respounte Jozon,
Gaou a leverez, Selton,
Flouroc’h e kan va milfid,
Zoken me lavaro d’id
E kollan kalzik amzer
O selaou va ograouer.
Ha Selton a respounte
Me ’ goll amzer koulz ha te ;
A veac’h ma koumans droug-sant
Dispaka e zoniou koant
Ma chom a zav ya fluen
Sorset gant e c’hanaouen.
An hini a reaz ar zoun
A roio kentoc’h rezoun
D’an hep ’ hen do ’r galon vad
Da baea eur voutaillad
Hag ar bount a vo staget
Evit pris ous he gaouet.
Me baeo, eme Jozon,
Me ivez eme Selton,
Ag e leac’h eur voutaillad
Setu diou e’n eur strollad.
Ha pep milfid ouz he dor
He deuz eur bount a henor.