Kanomp, kanomp hen Brezonnec
Taollio-kaër an dut kalonnec,
Kanomp hor tado hen dachenn
Bopred heb doan, huël ho fenn.
Hen Brezonnec, ac nann hen Gall,
A gomze hor tado gweec’h-all :
Hen Brezonnec kanomp n’hin c’hoaz
Hor brezélio, hor feïz er groaz.
Ac lavaromp vell hor tâdo : —
« Goëll a zè henor wit mâdo ! —
» Me droc’ho c’hoëc’h ma zeod hem beeg,
» Kennt wit didisk ma Brezonnec ! » —
Ar goüan a oa rust meurbet,
Dré-oll an dour a oa skornet,
Ac d’an tràon a teué an erc’h
Er meneïer, hen doüar kerc’h. —
Dré an hennt gwenn, grem-dost d’an nôz,
Er mâner deuas Gorvel gôz,
Gorvel gôz, ar Barz baleour,
Tri-ugennt blans, ac dall ac paour.
Goudé r’pédenno, goudé koân,
Bihan ac braz, hen tâll an tân,
A gomz ouz an newenntiso,
N’taollio-kaër c’hoarveset er vrô.
Neuzé peb goaz a dân hi gorn,
Ac tro-war-drò, a dorn da dorn,
Ar skudell gistr so trèmenet,
Ac peb-hinin larr : — « D’ho iec’het !
» D’ho iec’het ! — Doue d’hô miro ! » —
Dan tad-côz penn-gwenn, grîz bâro. —
Ar plac’het a so ho neeân
Hen traon an ty, ac ho kànan.
— « Cànet d’himb eur werz, Gorvel gôz,
» Eur sôon newez pè eur werz côz,
» Eur werz gwec’h-all, eur werz brezell
» N’tré ar Saoz ac ré Breïz-Izell. » —
Ac ar Barz coz Mâlo Gorvel,
N’korn an tân, di-war hi skabell,
A gânas neusé ar werz-mân,
Pé-hinin diskas digant-hân : —
« Hen aod-vor pa z’hon tréménet,
» Ar Mor-côz oa meurbet teret ;
» Dislonka ree korfo mâro
» Na c’houlenné miret n’hi vrô.
» Ar Brini-môr, a vagado,
» Diskenné n’eùnn gâna enn-ho,
» Da dîbri kalon ac Lagad,
» Ac-a n’eùnn vewé gant ar goad.
» Eûnn Toûsec oa n’kalon unan,
» Lavaré vell-henn da eur vrân : —
» Pébeus dibri è kalon Saoz ! —
» Kalon Saoz milliguet ac faoz ! »
Eur Louarn neusé digweas,
Ac è-vell-henn a lavaras : —
— « Yan Saoz urvéé, m’hen goar ’fad,
» O cass Breizad eneb Breïzad.
» Ré Breïz-Bihan, deûs breudeur pell,
» Biskoaz hen tré-z-hè n’oë brézell :
» Keït ma vô roc’h hen léz ar môr,
» N’eûnn gàro Erin ac Armor. » —
Bars hen Sant Cast, hen lez ar Môr,
Diskennas ar Saoz gant fulor,
Wit kômered brô Breïz-Izell,
Ac ober d’himb goall ac brèzell. —
Deûz ho listri hint dilampet
Hanval ouz bleïzdi araget,
Ac ar mâro ac an tân-goall
Dré-oll a c’heuillé an dut fall.
Iliz, ac kastel, ac maner,
Koulz vel lojenn ar pesquetaër,
A deuveus laëret ac tànet,
Groagué ac bugalé lâzet. —
Med kement se na baad qet pell ;
Tud a so c’hoas hen Breïz-Izell
Wit difenn ar feiz ac ar vrô,
Hen peb tachenn, bet’ ar mâro. —
Deus ar meneïr, ar c’hoajo,
Ar lanneïer, an traouïenno,
Paotret Breïz a so diredet,
Côz ac iaoûank, pas deus clewet.
« A raok ! a raok ! Bugale Breiz,
» Paotred heb doan, a galon reïz ; —
» Pa deû ar Bleiz maës ous ar c’hoad,
» Red eo skeï, hen beûzan n’hi voad !
» A raok ! ac heb truez skoët
» Hen drem an diaoulo milliguet !
» Dant Doue iell neb a Varwo
» difenn hi feïz ac hi vrô ! —
» A raok ! paotred vad kalonec,
» Pe-ré a gomz ar Brezonnec ;
» Doue so gant-oc’h, ac ar reïz,
» Ac Doue a garr paotret Breiz. — »
Ar Saozon a goëz vell keillenn
Dindan hor zàolio hen dachenn,
Ac a z’hint distaolet er môr,
Gant ar baotred-vad an Armor.
Ouz kosté ar Saoz eur bagad
A gâne o vônt d’ar stourmad. —
Penoz a c’hoarvé kemennt-man ?
Hor rè ho intennt o kânan !
« — Ar werz-se hor n’eus bet clewet
» Er meneïer liez meurbet :
» Ar ré-sè so iwé Breudeur,
» Breudeur d’himb èbars hen Breïz-meur !
» D’an traon-ta mousquet ac c’hlézé,
» Na vô groët neb drouk d’ar rè-sé :
» Gant goad ar Saoz a so c’hoëz mad,
» N’scuillomp morse goad eur Breizad ! »
« N’hin hor n’eus breudeur er bed-oll,
» A-boë ar vrô mo saov an Eol,
» Betek Armor, ac pelloc’h c’hoaz,
» Bet’ Erin, hen kreiz ar môr braz.
» Memeuz sônio,memeuz Gwerzio
» A gâner barz hor méneïo
» Ac er meneïo a Vreïz-meur,
» Ac hen Erin, mesk hor breudeur. —
» Doue a rô d’himb ar gônit : —
» C’hui, ré Breïz-all, a iello kouit,
» Da laret d’hor breudeur pell-Brô
» A z’homp kâlonec é-vel-t-hô.
» Wit ar Saozon, laret d’hô ré
» A fell d’himb mîret a nè-sé,
» Wit ober teill gant ho c’horfo,
» Da gaôut eed kaër er parko.
» Da dibri d’ar brini hen aod,
» Lec’h peb-himin hen dèfô laod,
» D’ar brini ac d’an Tousseget,
» Pé-rè a garr an neb seurt boëd.
» Paotred Saoz, dalc’het c’hui koûn mad
» Ouz an Trégont — goassa stourmad ! —
» Ouz Sant Cast, ac iwé Gwesklenn, —
» Henès na ankouafet biqenn ! »
Paotred Brô-Saoz, c’hui hen disko, —
Eur Bréïzad da difenn hi vrô,
Hi vrô, hi feiz, — a dâl kant den,
Ac na deûfet d’hor guelet quen.
Ia, da vikenn n’hin difenno
Hor feiz, hor zennt, hor Ilizo,
Bréman an deiz, e-vell gwec’h-all,
Eneb Saoz, koulz ac eneb Gall. —
F.-M. LUZEL.