Kempennet eo ar zal ’n eur stumm ken deread
Ken ac’h eo enn dudi evid an daoulagad :
Ouz ar mogerio gwenn ardamezou aouret
A lugern ken skeduz hag an heol binniget ;
A-hed an treusto derv e red garlantezio,
Hag er prenecho ’zo displeget bannielo.
Eun theat ’zo zavet en eur penn deus ar zal ;
Ar skolaerien yaouank ia enon da farsal :
’Wecho reont c'hoarzin, a-wecho-all gouelan,
Ha peb-hini anê a ra deuz e wellan ;
Azeet war banko, ar c’herent, aketuz,
A ro skouarn d’o c’hlevet, heg holl ’c’h int evuruz.
Pep an amzer, pa ve tavet ar vugale,
Zonerien ijinuz ’vel na ve ket bemde
’C’hoari gant gwiegez, hag o zono sklentin
’Laka ar c’halono laouen, drant ha lirin.
Zeblantin ’ra d’an holl ’c’h int zavet d’an Nenvo
Da glevet, eur pennad, kan an Eledigo…
— o —
…Chetu achu ar fars, tavet ar zonerien
Ar mestr braz ’neuz roet kuzul d’ar skolaerien.
Ar c’herent a selaou, ha war ar zal a-bez
E koe eur zioulder dispar ha dianvez,
Rag Krog ’oar da henvel ar prijo goneet,
Ha da rei aneze d’an neb ec’h int dleet.
Du-hont, e-mesk ar bobl ’barz ar renk diwean,
Eur vamm deut war an oad, gwisket ’vel ar paouran
A selaou gant dudi gervel he mab yaouank,
Ha gant al levenez, an daerou a red stank
War e diou jod krizet gant ar boan hag an oad,
Hag en he gwaziou birvi a ra he goad.
He mab en-pad ar bla an euz labouret stard ;
Gwelet ’ra anean, du-hont, laouen ha sart,
Ha gant-an eur vriad prijo brao alaouret,
E-touez an otronez souezet o welet
Eun testeni ken skler deuz e skiant dispar,
E sentidigez vraz, hag e aket heb-par.
Gand e vriad prijo, arri eo ’n he c’hichen
Ha hep fouge ebet ’ro d’ei e gurunen ;
Hag ar vamm gez neuze, gant ar joa ar vrasan
A gurun he mabik ’n eur vriata ’nean ;
Hag ar briata-ze a gas pell diout-i
Ar zonj ken ankenius dimeuz e foanio kri.
— o —
Kaeran de, marteze, ’zo en bue eur vamm
A gas he bugale da heuilh skoliou divlamm
Eo an de ma kurun anê dirag an holl ;
Kement-se, a dra zur, ’zo ’vit-i eun digoll
Deuz an diouer poaniuz e deuz bet a bep tra
Evid derc’hel anê er skol e-pad ar bla.
Skolaerien dieguz, mar n’oc’h ket kollet krenn,
Ha mar zo chomet c’hoaz eun tamm poell en ho penn,
Zonjet en ho kerent a labour noz ha de
Dindan an holl amzer, an heol hag an arne,
Da c’honid peadra da bean ho mestro ;
Labouret ’vid digoll anê deuz o foanio.
An Tremener.
1 a viz Eost 1898.