Rimou ha Goulennou

Eus Wikimammenn
Sauter à la navigation Sauter à la recherche



RIMOU


HA


GOULENNOU


EVIT AN EUREUJOU



E MONTROULEZ,
E ty Lédan, Impr., e traòn ru ar Pave.




RIMOU,


DISCOURSIOU HA GOULENNOU


EVIT AN EUREUJOU.


————


Discours pa zêr da bedi da eun Eured.


SALUD dêc’h oll, compagnunez,
Dre ar zalud e commançàn va devez.
Me a zo deut da doull ho tor
Gant calz a joa hac a enor :
Antreet joaüs en ho ty
Gant eur c’hoant vras d’ho saludi.
Da Zoue e rentàn ar zalud humblamant,
Ha goude me ray va c’homplimant.
Piou eus an ty-màn a bedìn-me da guenta ?
Pedi a ràn ar mestrou ha qement zo ennâ :
Mar deus domestiqet en ho ty,
En o fedàn ive qercoulz ha c’houi ;
Rac re a labour am be-me
O pedi an eil goude eguile
Da zonet hep faut da eur Banqet
A vezo evidomp preparet
Gant Mari Lipiq ha Yan Baron
Pere ho ped ganemp-ni a greiz calon :
Fixet eo an devez da Zemeurs qenta ;
Rac-se, mar plich ganêc’h, deut oll da asista.
En Plouyan vo an Eured hac en ty Flampez ar Banqet :
Mar plich ganêc’h en em gafet hac o vimp contant rentet.
Me ya da gonta dêc’h eur veach :
Dont a reot da… da guemer ar plac’h ;

Ac’hane e vezo cunduet d’an Ilis,
Betec an Auter, evel ma zêo reqis
Evit ober eur memes contrad
Evel a eure goechall he mam eus he zad.
Eno neuze e vezint eureujet
En presanç Doue hac an asistantet,
Gant solanite vras an Ilis.
Comzomp brêmàn on bêr divis :
Me eo an hini a zo choaset
Da bedi evit ar plac’h a Eured,
D’e fedi ha d’e enori,
D’e asista da eureuji.
N’ouzòn qet sur a Gomplimant,
Ha n’oun qet custum da barlant ;
Mes yaouanq òn, hac o tesqìn :
Mar plich ganêc’h va excusìn.
Qer brao oc’h eus lemmet ho têod,
Evel eur falc’h da drêc’hi yêod,
C’houi oc’h eus eur sac’had langach,
Ha n’en dêo qet allamagnach.
Preparet oc’h eus ho tiscoursiou,
Ha studiet mat ho rimou ;
Mes abars ma viot er penn e vezo tom ho chaqeden.
Ni zo o clasq eur goulmic venn hac a ra hon anqen ;
C’houi a elfe renta rêson
Deomp-ni diouti, va mignon.
Pa gomzit eus a goulm, oc’h en em goall gavet :
Ho qentel o ouzoc’h, ha caer e zêo rimet.
Ma vijen bet er c’hademi,
Me a rêsonje coulz ha c’houi,
Hac a denje eun tol latin
Ouzoc’h dre ma zoc’h eur potr fin.
Eun den yaouanc zo en hon touez abaoue pemzec dez,
En devoa arêtet da bares eur plac’h eus ho compagnunez ;
Bez o tle beza anavezet :
En e scoaz cleiz e zeo blesset.

Santout a ràn, dre ho comzou,
Coulz evel dre ho complimantchou,
Ho poa ezom eun dra benac ;
Me meus em zy eur vanden vat
A c’hraguez coulz ha plac’het,
Mes neus nicun anê blesset.
Ar blesseur en deus ar plac’h-se
A vezo certen prest pare,
Hac he servicher, coulz hac hi :
Digassit-hi deomp deus ho ty ;
N’ho pezit morse nep chagrin,
pareet vo hep dale fin.
Evit contanti ho speret
Me a ya etouez ar merc’het.
Cetu amâ unan dirazoc’h,
Ma na blich dêc’h, dificil oc'h ;
Eur vaouez adret ha lijer,
Hac a voar bravic e micher.
En em lacat a rit en risq
Da gaout eun affer meurbet trist ;
Evit beza ar vreg-se en ho ty,
Na ellit qet dispos diouti.
Me a vel, n’ouffec’h qet e nac’h,
E fell dêc’h sur guelet hor plac’h :
Cetu ama eur pla’h yaouanq
Jentil ha coant, guyê ha galant :
N’eus goas er seiz parros tosta
A refusfe certen houmâ.
N'êo qet da veza refuset,
Ma vije dìn-me permettet.
Plac’hic yaouanq, savit ho penn
Da zellet ouz ar gristenien :
Abars nemeur, me a esper,
Ho pezo eur güir servicher.
Me gred o zoc’h re importun,
Hac o chomfoc’h sur hep nicun.

Güelet oc’h eus ha plac’h ha greg :
Ha n'êo qet contant ho speret ?
Arça eta, va mignon bras,
Qent ma qüittaimp-ni ar plaç,
Digassit deomp ar Plac’h Nevez,
Gant cònje he zud hac he lignez,
Evit laouennâd he fried,
A zo meurbet goall gontristet.
Goulen a reomp a galon vad,
Gant oll bennos ha mam ha tad.
Hac e oll guerent, Cathel an Dourdous,
ha Yan Gundu, gant e doc plous,
Da vont d’an Ilis da eureuji,
Evit achui an demezi.
Qer brao, va mignon, e comzet,
Ho refusi na ellàn qet :
Brêmaic souden, en eun istant,
Me laqai ho speret contant,
O presanti dêc’h an objet,
Ha n’êo qet mez sur e güelet.
Cetu amàn eur fumelen
Qer caer evel eur giroflen ;
N’eus na fourdilis, na levant
Evelti qer rejouissant :
Avancit eta, Den Nevez,
Evit rêi an dorn d’ho mestrez.
— Didostait eta, va mignon,
Bremâ demeus a greiz ho calon,
Da ziguemeret ho pried, ha dalc’hit mat dezi bepred
Er c’hlénvet hac ar yec’hed pa viot unisset.
Neo qet qer fall ho qevridi,
N’antreot sur ebars en ty
Da benn an daul vit e c’herc’hat :
Graç dêc’h ho taou da veva ervat
E doujanç Doue, m’o recevo
En e c’hloar goude ho maro.



Amàn e peder ar Bederien da antreal en ty ha da zevel ouz taul.


Ar Plac’h Yaouanq.


Silanç eta, Compagnunez,
Ma parlantìn evit ar plac’h a Zevez.
Dre ma zavàn ebars em za,
Excus diganêc’h a c'houlennàn.
Mari Lipiq e deus va feded
Da eva eur banne d’e yec’het.
peb action gaër, pa er gràn,
Dre Sin ar Groas er gommançàn :
En hano an Tad, ar Mab, ar Speret Gloan,
Tri Ferson distinct en unan :
Da Zoue ar zalud da guenta,
An eil d’an ltron Varia,
An drede d’ar Zent ha d’an Æle,
Dêc'h-hu, compagnunez enorabl, e presantàn 'r bevare,
Evit ar boan oc’h eus bet,
E zàn da rei dêc’h peb a voqet,
Pini a meus dastumet er Jardin a Eden,
En eur c'’haread fleur, pa voan enni o pourmen :
Da guenta d’ar Vêleyen o roàn ar bec’herien,
Dre ma zint o Fastoret hac o Gouarnerien ;
Goude d’an Dud-Chentil ha d’an Noblanç,
Pa e meus an enor da barlant en o fresanç ;
E roàn ar gurunen spern
A zougas Mab Doue, p’or prenas eus an ifern,
Evit ma teuyo da biqat o ene,
Ha ma vezint ferm da zouten ar Fe ;
Dêc’h-hu, tud demezet, ezac’h ha graguez,
E roàn ar vezen a vuez,
Rac en deillou me meus bet remerquet
Ar c’homzou precius ens ar baciantet.
Ha c’houi, goazet yaouanq, m’ho ped da imita
An Autrou St-Joseph, pa voa var ar bed-mâ.

Ha ni, merc’hed yaouanq, laqomp hor fantasi
Da enori ar Verc’hes, pini a hanver Mari :
Imitomp he fervor ; beza e zeo ive
Rouanez an douar hac ivez eus an êe.
Me zo en em velet hirio eus a eun dra,
Ha n’en dòn gouiapl na capapl aneâ ;
Rac me zo eur plac’h yaouanq ignorant,
Hac e meus nebeut a sqiant ;
M’am bije bet eun tam disqamant,
M’em bije têod avoalc’h evit parlant.
Mari Lipiq, mignonet, hirio sur a lavar
N’eus nicun er gompagnunez n’e c’har :
Mes ar re e enor o tont d’e asista,
Eus ar re-ze sur e deus calz a joa :
Mes eun all zo ordrenet dei da garet ;
Cetu ama e hano : Yan Baron e zêo hanvet.
Arça ta, Compagnunez enorabl, me ho ped,
Pa zomp amâ oll en em rassamblet,
Eun tol chanç e ve demp en em gafemp james,
Hep mancout hini ebet assambles.
Ne meus na pouvoar, na gallout
Da ober reson dêc’h-hu tout.
Mes breman e zàn da eva eur banne
D’ho yec’het oll an eil hac eguile.

Eva ra eur banne da yec’het an Den Yaouanq.

Me ya c’hoas da eva eur banne
Da yec’het an den Vaouanq ive :
Hac evit ma vezo ganêc’h anavezet,
Charlezic Mistiflor o zêo dre oll hanvet.
Dêc’h-hu-ta, Mistiflor, bremàn e reqetàn
A bep seurt madou er bed-màn,
Hac oll soùet var ar bed, mar dê gant Doue destinet.
Ma vijen tenzorierez var oll tenzoriou ar bed,
A netra ne vijec’h refuset ; mes Doue en deus gouarnet
Evit bea er bed meulet : evomp eur banne d’hor yec’het.


Discours evit goulen eur Plac’h Neve da eureuji, gant ar Respont conform evit e rei.


————


Goulen. Debonjour dêc’h, Compagnunez,
Salud gant laouenidiguez ;
pa ho qüelàn aze assamblet,
Dibreder ha qer brao güisqet,
E credàn mad oc’h eus amzer
Da zelaou eun daou pe dri guer.
Ni a zo amàn tremenedi,
Carguet demeus a guevridi :
Lavarit demp eta bremàn
Peseurt hano en deus ar guêr-màn.
Respont. Ni a rent ar memes salud
Dêc’h oc’h-unan coulz ha d’ho tud.
Sansipl omp d’ho complimantchou,
coulz ha d’oc’h oll reverançou,
Hac hon eus calz a interest
Da supposi oc’h tud honest ;
Mes mar dêo tremen e fell dêc’h,
N’hon eus affer abet ganêc’h.
G. Ouz ho clêvet o parlant,
Me gred oc’h eus calz a dalant,
Hac e velàn ive ractal
E zoc’h Eur en gout da farçal,
Pa zêo güir na respontit qet
D’ar pez a meus goulennet ;
Mes ni a zo deut eus a bell,
Ha mar chomomp-ni discabel,
Ec’h alfemp-ni goude c’hoezi,
Dont da drapout eur pleurezi.
Rac-se, permettit demp souden
E c’holofemp brêmàn hor penn :
Mar cavit eo zo difêçon,
Levarit demp-ni ar rêson.
R. A viscoas e meus bet clêvet

Eo fall pennou loe avelet ;
Ha mac’h attrappit pleurezi,
N’em em glemmit qet ouzomp-ni :
Beza oc’h eus pep liberte,
Grit ta diouz ho commodite.
G. Penos eta ! va güir vignon,
Me ho cav eun den a fêçon,
Hac e laqen ebars em speret
E vijen bet ganêc’h pedet
Da laqat an tan var va fiben,
Dre ma zomp güir amezeyen ;
Neuze souden, en eur fumi,
Me a lavarje va c’hevridi,
Hac er fin neuze va C’homplimant,
Ha mar bije d’ho santimant,
Ho pije bet ar civilite
Da offr eun tam hac eur banne.
Ma vijec’h bet qen aviset,
O pije sur calz gonezet,
Rac me a dleye he pedi
Da zont ganemp da zijuni,
Ha goude zo c’hoas da leina,
Hac erfin goude da goania ;
Mes pa na rit demp qen enor
Nemet da zivoal toul ho tor,
Ha chom qer fier en hoc’h èz.
Evit hon delc’hi-ni ermèz,
N’en doc’h-hu qet eun heretiq
Pe mab d’ar fals-pinvidic ?
R. Selaouit mad, va c’hamarad ;
En em entent a gaffen mad.
Ni hon eus güelet avichou
Certen tud a vandennou
Oc’h antren ardiamant amâ,
Hac o tonet da zifframma
Qig hac anduill, lin ha qig sall,

Crampoez, ha calz eus a draou all ;
Hac eo ret mad deomp, goude-ze,
Delc’hel hon ty en surete.
Allas ! ni ne ouzomp doare
Ha c’houi a vez eus ar seurt tud-se ;
Gouscoude mar doc’h scuis en ho sa,
Ha c’hoant dêc’h-hu da azea,
Me royo dêc’h eur voutez prenn :
Azeit unan en pep penn ;
Neuze, hac e vec’h-hu ermèz,
E parlantot güell en hoc’h èz.
G. Mar deo difianç ho laqa
D’hon trêti er feçon-mâ,
E tisclêryan dêc’h a bouez penn
N’omp qet ar seurt friponerien,
Laeron anduil ha qig sall,
Na troyadellerien all,
Mes hon deveus commission
Conform d’hon religion ;
rac merqet eo ebars er Scritur
Penos güeachal eun den fur
A voa hanvet Eliezer,
A ras ar memes micher ;
Ha penos, hervez an histor,
E voe trêtet gant calz enor.
R. An histor-ze sur, va mignon,
A verit calz attantion.
Eun talant demeus ar c’haera
Eo gouzout en em explica.
Hac erfin eus ho complimant,
Mar bezit eus hor santimant,
Ni a velo petra da ober,
Hac petra ras Eliezer ;
Pe mar er c’herit, da guenta,
Livirit petra voe grêt dezâ.
G. Eliezer, va mignon qès,

Ne voe qet bet lêzet ermès :
Deputet e voe gant e vest,
Evit pini en d’oa interest,
Da glasq eur plac’h voa destinet
Gant Doue evit pried
Da Isaac, den yaouanq flam,
Ha mab unic da Abraham.
Evelse dre urz an Tad,
E partias mintin mad,
Hac ec’h antreprenas joaüs
Eur veach hir na fatigus,
Var zu ar Mesopotami,
Hep gouzout hent ebet da vont d’y.
Mes pa ignorer an hentchou,
E rêr mad var boes goulennou.
Evelse pa zòn êruet amàn,
E c’houlennàn hano an ty-màn.
R. Ho ! ma vije deut hennes amàn.
Ni hor bije poqet dezàn ;
An den-ze, var a lavarit,
A voa eun den leun a verit :
Mes bremàn eus eun amzer all,
Hac e vale calz a dud fall ;
Bremàn e veler bizier-balan
Prest da grevi gant bêr-alan,
Oc’h invanti niver traou
O clasq laqat güir ar gaou ;
Uza a reont tout o adres,
O prometi môr ha menes :
Eun den a lavar calz a draou,
Ne zint peurvuia nemet gaou,
Mar doc’h eur gascon evelse,
Troit ho qein pe it adre.
G. An hini a zo va model,
A voa güirion ha fidel,
Clevit cvhoas daou pe dri guer,

Var gampagnou Eliezer,
O veza bet pedet Doue
D’e gundui en demarch-se,
Ec’h êruas directmant
Elec’h ma edo ar plac’h yaouanq :
caer evel eur stereden, en eur famill an honesta,
Tud demeus ar re charitapla.
Pedet e voe da vont en ty,
Qinniguet dezàn da zêbri ;
Mes én a Iavaras a grenn
Ne guemerje nep brienen
Nemet goude explica
An urzou voa roet dezâ.
Aman ive, va breur qer,
Ne rit qet deomp coll hon amzer :
Deut omp gant an intention
Evit ar memes commission,
Hac e zeo deomp-ni revelet
Emedi aze hon reqet.
Caer ho pezo dissimuli :
Hor plac’h a zo ebars ho ty :
Lavarit dêi e mòn amâ
Gant an hini a gar ar muia
Demeus an oll grouadourien
Pere a vev hac ha dremen,
Hac én eo a bed anezi
Da zont breman da gontracti,
Evit beva ervat assambles
Ar rest demeus o oll buez.
N’en em arretàn qet da veuli,
Da fougueal, na da bompadi ;
Ni a voar ervat manifiq
Peguer mad eo, peguer pinvidic ;
Anfin eun den eo eus ar güella
A guement a zêbr bara.


————


DISCOURS

Evit goulen eur plac’h da zemezi, m’ar be ar banqet elec’h ma emedi ar plac’h, ha mar be goulennet goude dijuni.


G. Abars ho quittat, Compagnunez,
E trugarecàn ho madelez
D’hor beza recevet en ho ty ;
Ha roet deomp da zijuni,
E tisclêriàn e zòn carguet
Da bresanti dêc’h eur reqet.
Laqet òn en penn ar vanden,
Hac o zeus c’hoant o parlantfen :
Hanzavi a ràn gouscoude
Oun indign eus an enorz-ze,
Dre na meus qet a dalant,
Discadurez, na calz sqiant.
Ar pez a deu d’am hardissât,
Eo ma credàn e zoc’h tud vad,
E viot prest d’am escusi
Ma teufe dìn ober fasi,
En despet d’am intantion,
D’ober mad va c’homission.
Rac-se, mar permettit d’ìn,
Digomplimant ec’h exposìn.
R. Disqeus a rit mil act a humilite
Ha qement a civilite,
Ma veritit sur gant rêson,
E rofemp dêc’h hon attantion.
Pinvidic ha den honest ;
Beza savant ha modest,
Zo qaliteou ar re gaera,
Mes nonpas ar re gommuna,
Hn gouzout trugarecât
Evii ar servichou mad,
N’eo qet certen an hent fall
Evit obten c’hoas re-all.

Parlantit eta hardiamant,
Hac exposit ho santimant,
Ha diouz ma zeo ho commission,
Ni a vo prest da entent rêson ;
Mes magnifiq e ve parlantet
Hac e ve hor pennou goloet.
R. Beza e meus hirio an enor
Da bresanti dirac ho tor
Eun den yaouanq leun a furnez,
Ha demeus hoc’h anaoudeguez ;
Eur merq bras demeus a sqiant,
Eo m’en deus preferablamant
Choazet unan eus ho merc’hed
Evit beza e bried.
Gouzout a rit e zêo dija
Publiet leir güech ar bromessa,
Ha n’hon deus den clêvet parlant
Eus a nep seurt ampechamant,
Nac e vet en em opposet
Da retardi an eured ;
Rac-se omp deut d’e fedi
Da zont hirio da gontracti.
G. Atao diouz costez ar vaouez
E ve clasqet mil digarez,
Ha na ouffac’h qet evit petra,
Nemet evit delc’hel an dud en o za.
R. Ne glasqan qet digareou,
Mes exposi va rêsonniou ;
Gortoz a ranqit, rac ar mab eus an ty
En deveus goall faoutet e fri,
Nonpaz ouz en em ganna,
Mes o fourra butun ennâ,
Hac e zâo redet d’ar marc’hat
Da glasq eun ados d’e c’hriad.
Mes da c’hortos ma teuy d’ar guear,
Rac ne zalêo qet, mêvar,

En deus va dalc’het me amàn ;
Evit ma respontìn evitàn :
rac-se e tisclèriàn dêc’h,
Ententit mad mar plich ganêc’h,
ret e ve pare mad e fri
Abars cass ar plac’h da eureuji,
En aon na vo ar bêleg spontet
O velet eur fri qer faoutet.
G. M’en divije lavaret dìn-me,
E voa bet qüit da vont qeit-se ;
Ia, rac me a voar parea
Gant remejou ar re zrolla.
An deiz all va marc’h du,
Eur marc’h mad, en creiz e fru,
A voe roguet o groc’hen
Gant eun tol dant digant eun azen :
N’ho pije birviqen devinet
Gant petra e meus e bareet !
Gant eun tam qic-sall d’e beinscillat,
hac eun anduillen d’e c’hriad.
R. Credit dìn, o redet bro
E tisqer traou nêvez atao.
pa voan er Spagn en arme,
Eun devez ma voa calz arne,
Abars an eost en nevez-amzer,
Ec’h êruas eur goal affer,
Eur vreg gant eun aër a voe flemmet,
Tout e zud a voo calz nec’het :
Facil e sònjit eo ar vreg a varvas ?
Mes nan, an aër hepqen co a grevas.
G. Me n’en dòn qet eus an dud habila,
Mes adress mad a meus da scrifa ;
Qenta lizer a scrifis biscoas
A voe scrifet gant eun aval poas,
Ha goude va güella pluen
Zo bet eur picol anduillen.

Ha gant qement-se tout,
Me a meus bet grêt calz a rout :
Ha pa bresantàn eur reqet,
E vezàn diouc’h tu selaouet ;
Ha ne bretantàn qet bremàn
Beza daleet reir amàn.
R. Choui a zo savet goal mintin
Da laqat an dud da c’hoarzin :
Mes an amzer a ya en dro,
rac-se hastomp buan a fo.
Ia eur gascon en deiz all
A ras eun dro ne voa qet fall,
Rac evel M’en devoa clêvet
Voa qestion eus eun eured
Gant familliou a gonseqanç.
Tud pinvidic hac a bresanç,
E vije manific dezâ
Mont ive dî da leina.
Evel m’en devoa calz a speret,
Ne voe qet pell ambarrasset
Evit caout prest eun digare
da gomz ouz tad ar plac’h neve.
Ar gompagnunez a voa êruet,
Ha den mui na c’hortoet.
Neuze ec’h antreas ar gascon,
Gant reverançou a fêçon ;
Anfin, scuis bras o saludi,
E lavaras da vestr an ty :
Me meus evidoc’h eun affer pressant,
A ell talvout dêc’h calz a arc’hant ;
Fachet òn d’oc’h interrompi,
Mes ne qet eun dra da differi .
Ar mestr a lavaras d’ar gascon :
Chommit da leina, va mignon,
Ha goude-ze, var hon abaster,
Ec’h ententimp ouz hon affer.

Pa voe grêt ar regal tout,
Ha deut ar poent da vont er rout,
Ar gascon neuze a lavaras :
Cetu amâ an affer bras.
Gant ho merc’h e meus bet clêvet
E prometit rêi cant mil scoët ;
Mes, mar qerit, me c’hemero
Gant an anter eus anezo ;
An anter all a chom ganêc’h,
Cetu eur gounit sclêr caër dêc’h,
An tad ne gavas qet dereat
Beza evelse goapeat
Credabl ê en em fachas ;
Mes ar gascon a bartias ;
buane ranqas trei e guein,
Mes attrapet, en doa e lein.
R. Ni nomp qet gasconet,
Mes tud sincer, güir Vretonnet :
Neo qet leinou eo a glasqomp,
Mes ar plac’h neve a c’houlennomp.
Me gred oc’h eun den ar güella,
ha ne ve qet mad ho trompla,
E ve pec’het oc’h amusi
Ha memes dont d’ho talei ;
Ar poz ze êruet ganêc’h,
Am gra calz nec’h, m’en assur dêc’h.
Abaoue dec’h ho plac’h yaouanq
E deus chenchet a zantimant.
Me a voa êt demeus ar vro
hac e sônjet o voan maro ;
Mes evel ma oun en em gavet,
E deus dìn-me diguemennet
N’em boa nemet eu em avanç,
hac em bije ar breferanç.
Qer buan diouc’h-tu, hep dalei,
Oun diredet d’e saludi,

Hac e ràn hirio güeladen ;
Cetu aze eun obaden.
Me a meus bet clêvet dija
Meur a guilloq o cana,
Hac evit n’en dòn qet c’hoas côs,
E meus güelet meur a vleiz en nôs.
Eun den terrubl oc’h, var ho meno ;
Mes piou a sònch dêc’h ho credo ?
Ni a voar penos o redet broyou
En em zammer a varmaillou,
Hac e rêr coll calz a amzer
O conta eur bern a c’heyer.
C’hoant oc’h eus-hu-ta d’hor sponta
Ha d’hor c’hass qüit hep netra ?
Ni nomp qet sur prest da cedi,
Hac e ve ret demp procedi.
Mar cedit ar plac’h-mâ gane,
Me gavo eun all d’ho toare,
Unan hac a voar menaji,
Ha mont a ràn dêc’h d’o brouvi.
An deiz all o voan o chasseal,
E yis en ty en eur basseal,
hac e d’oa uset eur c’houlaouen
Evit clasq eun tam côs spillen.
Admirit eta pebes greg,
Uza eur c’houlaouen a vennec
Evit eur spillen dic’hroset,
Ha c’hoas no voa qet bet cavet.
Mar doc’h bas-valan, comzit ouz ennez
Da varc’hadour an allumettez ;
Pe autramant, mar plich deoc’h,
Goulennit-y eta evidoc’h ;
Hor plac’h-ni a zo en ty-mâ,
Roet o deus demp e fromessa,
Gant consantamant e zud :
Clêvit gante, n’int qet mud.

Seblantout a ra ouz ho clêvet,
E ve an affer decidet :
Ha mar de güir qementse,
Ne qet me mui a rêi dale.
Permettit dìn-ta eun nebeudic
Ma rìn brêmê eur baleic,
Da c’houzout hac én zo en ty
Eur plac’h contant da zemezi.

En eur bresanti eur Plac’h Yaouanq.

Sellit eta amàn, va mignon ;
Homàn zo eur plac’h a fêçon :
Mar dêo contant ha d’ho toare,
Lezit eta grêt evelse.

Complimant da eur Plac’h Yaouanq.

Bonjour deoc’h-hu, Plac’h coant,
Fleuren fresq, boqet charmant :
Certenamant n’en deo qet c’houi
A dle chom hep caout ho parti.
Plijet, goude ar goulennou,
E ve casset an embannou.
hirio na ellomp qet dale ;
Eur vech all a zo adare.
Ma n’oc’h qet ervad contantet
Gant an objet zo presantet,
E zàn c’hoas da ober eur bale,
da glasq unan a vo d’ho toare.
holla ! ni n’en domp qet tud fall
Da zont da guemer tra eun all :
Ar vreg-se a zo perc’hennet,
Nemet bez e vez divorcet ;
Eus ar seurt-se mallig hini
No deuyo ac’hàn ganeomp-ni.

Da eun Intanvez.

G. Arça eta Plac’h Yaouanq coant,
Petra eo eta ho santimant,
Pa velit ar re o deveus bet

Prest adare da gaout fret ?
Ma na garit hasta a fo,
E medoc’h en risq do goll ho tro.
Va excusit, m’ho ped, maouez vad ;
Permettet eo certen badinat :
Mes n’en dêo qet eruet c’hoas
An hini a dle dont d’ho choas.
R. Mar güelit begou e boutou,
E velot souden e seuillou :
Me gred assur e zoc’h den habil,
Mes da viana e zoc’h difficil.
G. N’hon deveus tam ebet disprijet
An objet a ve demp presantet ;
Hac evel ne zeus coz voutez
Na gaver dezi he farez,
Onnez ivez, aboues guedal,
Me a gred a gavo eur chanç all.
Ni n’en domp qet deut assur eviti,
Ha ne sònjomp qet a grenn enni,
Mes evit an hini a zo embannet,
…………………………… e zeo hanvet ;
Hac evit e designa ervat :
…………………………… êo he zad.
Ne glasqit qet eta digarei,
Pa zêo guir e màn en ho ty.
R. Sclêr mad êo sur, pa expliqit,
Eus a behini e parlantit ;
Mes ret êo goulen diouti
Ha contant êo da zemezi.

Mont a ra da ober eur bale.

Ouz an daul e meus hi cavet
Tranqilamant bras azeet,
Ha e deus lavaret dìn-me
Ne voar qet piou a zo aze.
Oh ! va mignon, ar respont-se
A zo tout-a-fêt d’hon doare :

Disqüez a ra e zê prudant,
Ha güir vestrez d’he zantimant.
Hac evel pa lavarfe c’hoas
Ne rofe qet e dorn da bep goas,
Mes hepqen nemet d’an hini
A zo bet destinet dezi ;
Ennes e just a zo amâ.
Ne broposàn qen nemetâ ;
Rac-se eta, grit demp antren,
Coulz hac an oll eus va banden.
Oh ! va mignon, na c’houi c’heus talant
Da drei an traou d’ho santimant !
Mes gouzout a rit, an habilla
A ell ivez avichou fazia ;
Rac-se eta, bremâ permettit
Ma lavarìn en em dromplit.
Mar de eus ar plac’h-se azeet
E zêo occupet ho speret ;
Ha pa e deus roet ar respont-se
Ouz traou all sur e sònje,
Rac amâ e zeus en em gavet
Alies a dud d’hor güelet,
Joa vras meurbet hon eus diouto,
Gant qementse evel ato
Eo en em gavet qer just ha tra
Da veza primeri ar bara
Dre chanç gouscoude dec’h e voa deud
Ar meliner laer gant ar bleud ;
Hirio eta me ranq poazat,
Hac ar plac’h-se ribottat ;
Hac ouspen qementse c’hoas,
Dêi êo ive da rolla an toaz.
Rac-se n’oc’h eus qet a voyen
Da gaout hirio hor femelen.
Ma ne zeus qen ouz ho trêza
Nemet primeri a vara,

Deut ganén-me oll a vanden
Da gundui ar femelen :
Ni hon eus eur zal vras preparet,
Tapisset caer ha fleurachet,
Poazet bara, qig ha stripou,
Paste, fars-forn, goadiguennou :
Eun dol hir a zo bet savet
Evit ober demp eur banqet :
Na c’hedomp nemet ar plac’h neve
Evit festa mad Molarge.
Pa vezo deut, ni a rai frico,
Ni a gano hac a gonto.
Ac’hanta eta, va mignon,
Petra a lavar ho calon ?
Qement a rit sur o pledi,
Em be c’hoant bras d’ho contanti ;
Gouscoude e vo dirêzon
Lezel va zy en abandon,
Rac certen eo evit merc’het
Ne qet ès dìn da zivoeret,
hac ispicial an hini
A fell dec’h da reqeti ;
Mes c’houi a zo grêt ho labour,
Ha n’oc’h eus ezom a nep zicour
Nemet da gana, da youal,
Da fricotta ha da zançal.
Cetu amàn eur potr boujant,
Hac a dalvo dêc’h qeit ha cant.
Bo ! ne qet da glasq ar seurt-se
On-me sur laqet da vale :
Tec’h alesse te, côs marmous,
Ni ne glascomp qet eur seurt mous.
Mar cavit ennes re dister
Evit dont da ober hoc’h affer,
Cetu amàn c’hoas eun all,
Hac evit ar güel n’êo qet fall.

Bonjour, dêc’h-hu, va den mad,
n’oc’h eus bremàn nemet tostât ;
Me gred eo dre guriosite
Oc’h en em bresantet aze
Evit güelet hor plac’h coant,
hac evit choaz ho santimant ;
Mes hon affer-ni zo da guenta,
Hac e fell demp e finissa.
Mar teuit amàn d’hon dale,
d’hon tro ni a ray dêc’h bale :
Ni ho paeo, hervez ar c’his,
Certen gant ar memes moneiz.
Lavarit dìn-me, me ho ped,
Ha merc’hed ho prô zo decedet,
Ma ranqit eta dont qeit-mâ
Da glasq merc’hed da fortunia ?
Me a glêo lavaret en Breiz
E zeus certen merc’hed aleiz ;
Ma rafec’h eur bourmenaden,
Ec’h alfec’h güelet meur a vanden,
Ha marteze abars fin ho tro,
Ho pe ar choaz eus anezo ;
Evit amàn na zeus nicun
Contant da ober ho fortun.
Lavarit dìn-me da guenta,
Petra a sinifi promessa !
Me a meus clêvet en peb amzer
E tleer delc’hel mad d’ar guer ;
Hoguen, unan eus ho merc’het
E deveus d’an den-màn promettet
Feiz qercoulz ha fidelite :
Ni zo deut da glasq an dra-ze.
Penos eta ? me am boa credet
E voac’h, c’houi, eun den a vras speret :
Güir eo, ar seurt-se avichou
O deveus calz demeus a ureou.

Quamdoque bonus
Dormitat humerus.
Ha credabl eo e ve en ty
Eur plac’h contant da zemezi,
Hac e ve êt qeit-se ar brud,
Hep ma ouffe netra ho zud !
Pa ho clevàn evelse o parlant,
Me vel oc’h eus calz a dalant,
ha têod mad, ha descadurez,
ha calz inzign ha mil adres ;
Ec’h ouzoc’h mad forji guêyer
Evit tremen ervad an amzer,
Hac e fell dêc’h, gant ho latin,
Hon amuzi-ni da c’hoarzin ;
Mes, hac e vec’h-hu avocat,
Pa noc’h eus qet dêc’h ar gos vad,
Me a esper dont d’o fêza,
Hac a c’hoarzo da ziveza.
Ridebit bene
Qui ridebit in fine,
Abars ma refot dìn-mo plega,
E scuizot sur c’hoas en ho sa.
Sellaouit ervad, va c’homper,
pec’het bras eo coll an amzer ;
Eur poent a zo evit pep tra,
Ha bremàn eo poent finissa.
Diou vech e meus bet goulennet
Ac’hann ar plac’h a eured :
C’hoas daou c’her all : diou vech anter ;
Decidomp buan an affer.
Eur vech, diou vech, anfin, teir güech ;
Cetu me bremàn direbech.
Roit din-mo bremàn ar plac’h,
Pe e zàn en hent gant va zac’h.
Ar banqet a zo preparet,
ha bezit sur e vo dêbret.

Goude qementse ni a velo
Pe c’houi pe me eo a baeo.
Ar pez a ra dìn differi,
Eo an ezom eus anezi ;
Rac ouspen ma zeo eur plac’h coant,
Leun a furnez hac a sqiant,
Eo dilijant en e labour,
En peb amzer prest d’am zicour ;
Mes mar oc’h eus-hi decevet,
Ha dija en em bromettet,
Allas ! ho c’halon a ve eno
Hac amàn a enep he meno.
Allòn, dont a ra em memor
Oc’h eus grêt dìn calz a enor
D’am pedi da vont d’ar banqet,
Hac oc’h eus bet memes pedet
Qement zo em c’hompagnunez
Da vonet ivez assambles.
Eh bien ! eno en eur banne güin
Me a veuzo va oll chagrin,
Hac a lavaro coulz hac eun all :
An affer-màn n’en dêo qet fall ;
Rac-se, evit en em accordi,
pa viot prest, deut-ta en ty.

Complimant d’ar Vreg-Yaouanq.

Debonjour dêc’h-hu, plac’h Nevez,
Me ho salud gant levenez.
N’en deo qet va c’hondition
Dont amàn dêc’h-hu da sermon :
Lezel a dleer qementse
Gant an nep o deus antorite.
Mar plich ganêc’h dont d’an ilis :
Eno ar bêleg, hervez e ofiç,
A explico dêc’h an oll zantelez
Demeus ar Sacramant a Briedelez,
Hac an oll obligationou

A gontract ar güir priejou.
Me a meus gret va c’hommission ;
Chanç vad dêc’h ha güir union.

Complimant d’an Ozac’h-Yaouanq.

Ha choui ive, va den prudant,
A verit sur eur c’homplimant ;
Me reqet dêc’h digant Doue
Pep chanç-vad ha prosperite.
Cetu dirazoc’h an objet
ha goulennet hac accordet :
Mar dòn bet ouz ho retardi,
Na gavit qet dies va excusi ;
Gouzout a rit an usach commun
Pa vez qestion eus ar fortun.
Bremàn, mar doc’h prest, hastit a fo,
Ne qet me mui ho taleo,
Nemet ma rofot peb a vanne
D’am chamaraded coulz ha dìn-me.






Discours evit goulen eur Plac’h da eureuji.


Salud, Compagnunez, gant eur galon ardant,
Eus a greiz va c’halon e ràn va c’homplimant,
Ma vouifen-me an tu, ar fêçon d’en ober,
E ve va brassa joa plijout d’hoc’h oll dousder.
Peb action gaër, d’e ober pa zeomp,
E zeo dre Sin ar Groas atao e commançomp ;
En hano an Tad, ar Mab, hac ar Speret-Glan,
Zo tri Ferson distinct en eur memes unan.
Abaoue ma voan bian, var brec’h va maguerez,
Me am boa an desseign da antren er Palez ;
Mes êru eo an deiz, an amzer ar vech-màn,
Ma meus bet an enor da zont betec ennàn.
Evit beza hirio antreet en ho ty,
N’ouzoc’h qet, marteze, tenor va c’hevridi :
Me zo eur messager zo amàn digasset,

Cazi hep gout an hent, gant an Den a Eured.
Mes pa zòn digasset eus e bers ho pete,
Me a ray e excuz ha va hini ive.
Qent avanç davantach, e zan d’en em adressi
Dêc’h-hu, ô va Jesus ! hor C’hrouer, hor Messi :
C’houi eta, va Jesus ! a ray dìn ar speret
Da explica peb tra evel ma zeo dleet ;
C’houi a ray dìn ar c’hraç, pouvoar hac elocanç,
Sclêrijen d’am speret da gomz en ho presanç.
Eh bien ! plac’h yaouanq, n’em strinqit d’an daoulin
Da c’houl bennos ho tad qent mont da eureujìn :
A beurs Doue an Tad e zeo demp ordrenet
N’ancounac’haimp qet nep o deus hor maguet.
Bennos Doue an Tad a c’houlàn da guenta,
Güir Grouer eus an ên, Gouarner ar bed-mâ ;
Mes güelet a ràn c’hoas, pa remerqàn ervad,
Penos e coe daëlou demeus ho taoulagad.
Ne qet ar pez oc’h eus grêt eo ho cra constristet,
Mes güelet ho Tad, ho Mam, penos int desolet !
Allas ! rêson o deus ; n’en dêo qet hep sujet,
Güelet e teuit da güittât nep en deus ho maguet,
Gant qement eus a soign savet bete vremâ,
Qementse a laqa o c’halon da rannâ.
Arça, Tad truezus, distroit ho taoulagad
Var ho merc’h ………… a c’houlen he mennat.
Emedi d’an daoulin dirazoc’h prosternet,
Deus a greiz e c’halon o c’houlen e souhet.
Ha c’houi, Mam dezolet, roit ho pennos ganti,
Gant ho merc’h ………… da enreuji. — Ia, ia, ia.
Holla ta ! ………… avoalc’h ê qementse :
Oboisset oc’h eus da Chourc’hemennou Doue ;
Grét oc’h eus ho tever gant guir humilite,
ha Doue ne c’houlen nemet güir volonte.
Eh bien ! ………… plac’h fur ha disqet mad,
avancit ho pasiou da vont betec ho Tad,
ha roit deàn daou boq eus a greiz ho calon,

Pa oc’h eus obtenet e venediction.
Distroit c’hoas eus ar Vam pini e deus ho canet,
Ho livret da zemezi, pa oc’h eus er souhetet.
Quent avanç davantach, me c’houlen eviti
Cònje he breur, e c’hoar, qent mont da eureuji,
Paeron ha maeronez, mar e maint var ar plaç,
Me c’houlen eviti ho pennos, diganeac’h.
C’houi ho poa contractet en Ilis eviti,
Hac hi c’houll ho pennos qent mont da eureuiji ;
Bennos he oll ligne, cònje ho oll c’herent,
Cetu aze ar seul sujet ma zomp-ni deut en hent.
Bennos ar re zo maro n’allàn qet da c’houlen,
Rac calz a galonou contristet a laqfen,
Güell e zeo eur beden d’ar ro zo decedet,
Eguet goul o c’hònje, pa ne maint mui er bed :
Dre ze en ho pedàn da lavaret gane
Ar salm eus an Ilis en repos d’o ene. De profundis.
Arça, compagnunez a zo amàn presant,
Me zezir ar boneur d’ho renta oll contant ;
Me ne meus qet, sivoas, speret an oll æle,
Da gontanti peb-unan hervez e volonte.
M’am bije ar pouvoar en doa Alexandri,
Pa voa bet prisonnier er guaer eus a Vitri ;
Ennes a ziscare, gant moez e drompillou,
Seiz muraill cimantet en dro da Jerico ;
P’otramant ar pouvoar en devoe Josue,
A laze en combat seiz ha trêgont roue,
A arrête an eol un heur anter en ær,
pa voa o combatti, evit rêi dezàn sclêrder,
P’otramant ar furnez en devoa Salomon,
Pe an talantchou caër eus an doctor Ciceron,
Me forchfe eun discours a vije d’ho souhet,
Nonpas deus an anter ar pez a veritet.
Eh bien ! compagnunez, en em rejouisset,
Cetu bet demp an hini pini hor boamp deziret,
Hac hi qer caër hac an de pe an eol ardant ;

Hor c’halonou memes a rente oll contant.
Rac e hini e-unan a zo pareillamant guyê,
Evel ma ve an deillou er güez en fin mis maë :
Memes qen a sònch dìn en devez a hirie,
E deveus astennet deg vlavez eus va bue.
Graç deomp d’en em velet er pales celestiel :
En hano an Tad, ar Mab, hac ar Speret-Santel.
Eno gant hon Æl-mad ni vo represantet,
Pa vo ret renta cont dirac Salver ar bed ;
E vo lennet an decret, hep hor favorisàn :
Demeus o meritou e vo barnet pep-unan.
Mar e meus choqet den dro re a liberte,
E c’houlennàn mil excus digant ho majeste ;
Bet e meus ho cònje, gant ho permission,
Me ho trugareca deus a greiz va chalon.
M’ho ped d’am asista evit e c’hundui,
Ma zefont gant enor d’e c’hass da eureuji.

Rimou evit goulen ha rei Plac’het da eureuji.

Orsus eta, compagnunez,
En em retirit oll a gostez,
Evit m’am bo an avantach da barlant
Amàn, en ho presanç, en langach eloqant.
Ne ouffen qet certen ober eur güelloc’h tra
Eguet dont da ober Sin ar Groas da guenta.
In nomine Patris, et Filii,
Et Spiritus-Sancti.
Ha neuze e lavaràn Amen.
Evit êchui ervad va feden.
Debonjour ha joa en ty-màn :
N’en dêo qet ………… a chom amàn ?
Ia, va mignon, eun action vad oc’h eus grêt,
Dre Sin ar Groas pa zoc’h commancet :
Me a ray ive coulz ha c’houi
In nomine Patris, et Filii,
Hac evit êchui ervad va feden,
Et Spiritus-Sancti, Amen.

M’am bije gouezet e teujec’h hirio d’am güelet,
M’em bije da fest preparet treid siliou, ha re arinqet,
Pêvar gartier eur guellyenen,
Ha diou scouarn eur verryenen.
Dont a ràn meurbet d’en em estoni,
Pa glêvàn peguer caër fest ho poa demp da brepari ;
Mes mar qirit dont dissul goude an oferen-bret,
Ni a breparo dêc’h ivez eur banqet :
Ni hon eus laqet dêc’h deus ar ber
Luz, alamandez, trinchin, mesper.
Hoc’h asistant, mar plich dêc’h, compagnunez,
Me ho ped da laqat meurbet eves,
Rac eur goall barti certen a velàn amàn ;
Mil aon a meus na golfen gantàn.
Eur groug-lassiq hor boa stignet,
Eur goulmic voenn hor bea trapet ;
Mes, allas ! ne voa qet goal gre,
Hac e zêo, sivoas dìn, achappet adarre.
E asqel glêi a zo torret, achap a bell ne alfe qet,
Hac hon eus clevet lavaret e zê amàn eo disqennet.
Yaouanq òn sur er bed, ar c’hustumou n’ouzòn qet :
Rac me ne meus qet studiet evit goulen na rêi merc’het :
Mar deu dìn lavarat netra sot,
Mar plich ganêc’h em excuzot.
Dre ma zòn deut da dal an ty,
Ne garfen qet sur dont d’ho choqi,
Na d’ho repren, na d’ho facha ;
Rac certen an dra-ze a ve sur ar goassa.
Mes evit cavet tro da barlant,
Ma vo a propos va c’homplimant,
Excus ha pardon a c’houlennàn :
pa blijo ganêc’h e comzìn bremàn.
Seblantout a rit beza habil,
hervez ma velàn, eus ho pabill ;
Rac-se e carfen gouzout ouzoc’h
Petra a glasqit, ha piou oc’h.

Me, va mignon, a zo oun den yaouanq
hac a zo bas eus a sqiant ;
Mes, mar dòn ignorant a dra sur,
N’en don qet ignorant dre natur ;
Rac ma noc’h eus qet anavezet va zad,
Mea rayo dêc’h anavezout e vab.
Ober a rêr dìn calz demeus a enor,
Güelet eur seurt compagnunez etal va dor ;
Mes ret eo dêc’h ervad lavaret dìn, va mignon,
demeus a betra e zeus qestion.
Gant ………… e zôn bet sortiet,
Demeus a ………… dre o gared,
da c’houlen dezàn da zont da eureuji :
………… a rêr eus anezi.
Tri embann, va mignon, oc’h eus bet clêvet
A zo bet lennet dissul gant ar bêleg :
Ha fennos, gant ar c’hraç a Zoue,
Hon eus sònch mad da gass ar bêvare.
Mar deuit, va mignon, bremàn d’hon rebuti,
Ni ho laqay souden da gaout eun troatad fri,
Hac e viot condaonet da baea an amand,
Ar pez a gousto dêc’h eun nebeudic arc’hant.
Va mignon, na lavarit qet a c’hevier ;
Güell eo dêc’h lavarat bremàn ho Pater ;
Rac bremàn-sounn, dre abiou ho fri,
Me a meus-hi güelet duont en penn an ty.
Doue en deus lavaret biscoas den en ên n’êo antreet
Nemet gant courach en defe combattet ;
Ha c’houi, va mignon, n’ho po qet ho plac’h,
Na ronqfot disputi eur pennadic mad c’hoas.
Glorius en ho cavàn meurbet,
Va mignon qer, gant ho merc’het ;
Ar merc’het a zo goall bejou, hac a scô evel diaoulou,
Ha pa doront o c’hêyelou, e c’hoariont gant o inqinou.
Evidòn-me a lavar crenn :
Birviqen en maouez ne fifen.

Ne ravodit qel va fenn dìn, autrone,
Diouz ar pez c’houlennit diganén me ;
Rac mar ho pe diganén-me tennet
Ar gaera demeus ar merc’het.
Goude diouzòn-me c’houi a c’hoarzfe,
Hac el leal, rêson mad ho pefe,
Ne grenàn, na ne chenchàn liou ;
Ma n’am be qet ac’hann, mo dremeno abiou :
Ma vemp-ni ganêc’h-hu refuset,
Ni a gavo el lec’h all merc’het.
C’hoarvezout a ra ganêc’h evel ar merdeadi,
A ya oll da naov heur da zebri dijuni,
Ha goude e vent enpad an de neuze o naviga,
Allas ! alies o clasq, o ranqont rabata.
Va mignon, na chommit qet aze d’ober brud,
Lipit bremàn ho peg hac hit buan d’ho clud.
Pa voac’h-hu êru gant an hent,
Me sònje dìn e voac’h eur vanden sent ;
Mes bremàn e credàn a dra certen
E zoc’h eur vanden merc’hetaeryen.
Me a ya da zivoucla bremàn va boutou,
Evit mont da zispen va roudou ;
Rac evit ac’hann, var a velàn,
N’hor bezo netra evit bremàn.
Mar d’oc’h attachet, en defot merc’het,
Me a lavaro dêc’h e pelec’h sur e qefet :
Mar qerit mont da vourg plougonven,
E cafot eno eur plac’h evit eur grampoezen
Sac’h ar bier ! ar re-màn afat a zo tud,
Coulz ar re vras hac ra ro vunut ;
Evit qement a meus bet dê lavaret,
Ne reont van ebet evit dont d’am c’hlêvet.
Me a vel ervad e ranqàn sur plega,
Terri ha brech ha gar hep en em vlessa,
Ha dont d’e digass dêc’h amàn da dal an nôr,
Da c’hout ha c’houi oerecevo gant calz eus a enor,


Presanti a rêr eur Vreg.

Cetu emàn eur plac’h yaouanq
Hac e deus eur speret contant,
A zo diangach a bep lec’h,
Hac a dal hirio qeit ha dec’h.
Ha nia na dêo qet mad d’ho cout,
Certen ec’h ellit mont en ho rout.
Ne douetan qet, va mignon coant,
E ve ho ty qen dibourve eus a blac’het yaouanq,
Na zisgasfac’h demp unan da velet,
Certenamant ne vezo qet refuset.
Mes houmàn a zo an daill var he beg
da veza êt pell zo d’ar vicher eus a vreg.
Me vel merqet var e chod clêi
E zeus bet goas o poqat dêi
Cassit-hi buen var be guis,
Gant aoun e defe drouc-avis.
Clêvet oc’h eus alies parlant,
O comz deus eur zal caer ha brillant :
Ia, va mignon ; me meus eur zal,
Hac a zo oll carguet demeus a draou leal :
A bep tu demeus an daou gostez,
Ne zeus nemet accajou hac olifes,
Ha dindan an treid, evit servicha da bave,
Ne zeus hepqen nemet lorenti ha lore.
Ia, ar zal gaer-mâ zo dro oll decoret
Demeus a beder blanten gaera a vo cavet :
Unan e zêo ar roz, eun all an tulipes,
Eun all ar palm superb, hac eun all ar cyprès.
Ha c’hoas ne meus contet dêc’h netra
Evel e zàn da gonta dêc’h bremà :
En creiz ar zal-màn o zeus eur femelen
Demeus ar re gaera e veljot birviqen :
E muzellou a zo demeus a roz bordet ;
Michanç e zêo onnes a fell dêc’h da gavet.
Va mignon, gouzout a rit ervat,

Pa gaver an avel eo e rànqer güentat ;
Ha c’houi, pa gafot discarg d’ho merc’het,
Me ho ped, mignonet, n’o refusit qet,
Ha c’hoas trugarecait Doue,
pa na reomp eguis Table,
En devoa da ravissa ar merc’het
An devez memes demeus o eured.
Cetu amàn eur plac’h yaouanq,
Zo qer caer hac an eol brillant ;
E diou chod a zo ruz evel ar ros,
Distinguet evel an deiz diouz an nos.
E zal a zo qer caer hac ar c’hristal ;
Laqat a ra calon mab da dridal :
Ha ma na blich qet homàn dêc’h,
Na ouffen qet petra da ober dêc’h.
Troublet meurbet eo va speret,
Pe eur banne re am be evet,
Mar deo honnes ar femelen
A meus grêt anêi ar goulen ;
Mes ar plac’h-se, pa zeo deuet,
Ne deo qet da veza refuset.
Me a zo ive eun den yaouanq,
Hac a meus eur speret contant,
Hac a zo diangach en peb lec’h,
Hac a dalvez hirio coulz ha dec’h,
A laqayo va dorn en he hini,
Hac a yêl ganti da zemezi ;
A ray outi peb contrat mad
Evel a eure e mam d’e zad :
A brometto dêi fidelite ha fe,
En qeit ha ma vìn en bue ;
A zalc’ho mad dêi bete mervel :
Ne ouffen qet lavarat güell.
Arça eta, ma mignon qèz,
Cedi a ràn ganêc’h ar plac’h nevez ;
Mont a ràn d’e digass dêc’h d’an nôr :

Me ho ped d’he receo gant enor.
Didostait eta, den nevez,
Da guemer en dorn ho mestrez ;
Evit rêi dêrc’h an arvoenti,
Laqit ho torn en e hini,
Ha sònjit penos e pado
Ho commanant betec ar maro.
Na deut qet d’e goaldrêti, d’e chasseal eus an ty,
Evel pa no anevefac’h qet anezi ;
Pe m’er grit, va mignon, selaouit mad eur guer :
Laqit ervat eves demeus ar goalinier,
Ar goalinier a zorn Doue oll-buissant
A bunisso ar re vechant ;
Da lavaret eo, ar goalinier
Demeus e fulor hac o goler,
Pere a ellomp da evita,
O veva en graç Doue er bed-mâ.
Pedit Doue, Roue an Tron,
Da rêy dêc’h oll e venediction,
Ha da asista en hoc’h eured hirie,
Evel ma reas güechal en eured Cana en Galilee.
Tachit eta da gundui eur vuez vad,
Hervez Doue hac hervez ho stad,
Evit ma c’hefot gantàn da repos
En fin deus ho puez en gloar Doue d’ar Barados.
Me a ya da laqat va zoq var va fenn,
Evel a dle ober peb christen,
Compagnunez, gant ho permission,
Pa meus grêt va dever ha va c’hommission.




DISCOURS
Da lavarat en qichen an ty da eur Goulen.


Salud, tud a enor, gant peb soumission ;
Tud eus a bep qalite hac a bep condition ;
Ho ty, ho madou hac o tomestiqet,

Hac ho polonte vad o deveus va charmet.
Lavaret a ellàn hardi ne voa qet bet biscoas
Gant qement a blijadur oc’h antren en eur plaç.
Ho ty so situet, qen tòen, qen muraill,
Eur plaç a blijadur, n’en dêo qet hep marvaill.
An nep en deus composet ar portret eus ho ty,
A zo eun den a speret, na fell qet dìn doueti.
Ne allet qet, va mignon, dont da baea ervat
Eun architect habil, ma na labour qet mat.
Me a zo bet o vale en calz eus a vroyou,
hac e meus goneet nombr bras a victoriou :
Mes hor Zalver beniguet a zo mervet er groas,
Qercoulz evit ar pinvidic evel evit ar paour, sivoas !
Eun amitie sincer o zeo va c’hevridi.
Eur femelen yaouanq zo maguet en ho ty.
Caret gant eun den yaouanq zo demeus ar c’hanton,
Hac a zo deut hirio an de d’e assignation.
E hano êo ………… brêmàn n’el lavarìn ;
Mes me en lavaro qentoc’h ma finissìn.
Prest òn da finissa hac ive da gommanç :
Mar parlantàn davantach, me am bezo setanç.
N’estimàn eur procuror o tifen e gojou,
Ma na c’hone e broces ha diounte ar gaou ;
ha mar cavàn-me c’hoas teir güech en odianç,
En durant m’ez selaouìn me am bezo setanç,
Rac roue absolu òn, mar qirit va chredìn ;
Pa choulàn va c’hevridi, o râànqit o rêi dìn.
Me êo ar Roue Arthur, puissanç souveren,
Breiz-Izel en antier zo dindan va c’hourc’hemen ;
Ia, en assuranç, güir Roue ar Vretonet,
Hac Autrou en Breiz-Izel d’an Noblanç, ha Princet.
Da guenta, evit commanç, breiz zo dìn en antier,
Montroulez ha Lanneur, Lannion, Landreguer,
Pontivi, Qemperle, bete güele Leon,
Castel-Lin, Porz-Louis, ar C’hroazic ha Crozon,
Ar Faouet ha Sant Nic, Cast, Moelan, Poullaouen,

Ha Qemper-Caourantin, castel-pol, Lesneven,
Plestin, Garlan, Plouyan, Langonaval, Güimec,
Lomiqel, Plouezoc’h, plougasnou, Sant-Briec,
Guerlesqin ha Benac’h, Callac ha Qèr-Ahes,
Plourin, Sant-Yan, Rosco ha Plouneour-Menez,
Hac ar guêr a Roazon, elec’h ma chom bepret
Parlamant Breiz-Izel hac e brezidantet ;
Ha Taule, ha Callot, Perros ha Lanvêlec,
Lambal ha Sant-Malo, Lampaul, Sant-Thegonnec,
Plêiber-Christ, Comanna, Plougonven, Locqirec,
Conqerne, ponabat, Lohuec, Carantec,
Pontrêo, Plufur, Sant-Sêo, Guiclan ha Pontmenou,
Plouaret, Enez-Vaz, Pont-Aven, ar Ponthou,
Plouescat, Plouizi, ha Castel-an-Taro,
Hac ar môr burzudus a ra dezo an dro ;
Coatreven, Pedernec, Pempoul, Plegat-Güerand,
Hac anfin qement zo dindan ar firmamant.
Arça-ta, plac’h yaouanq, va güir bried fidel,
Cetu c’houi Rouanez ebars en Breiz-lzel ;
Cetu c’houi Rouanez var ar c’heriou hanvet :
Bezit eta contant eus ar fortun a ret.
Oh ! saperlot, terrupla den oc’h, c’houi,
Studiet mad oc’h eus sur ho filosofi,
Hac e zeo certen impossubl dêc’h manqout ;
Mes me zo ignorant, n’ouzòn netra en tout,
Nemet dêbri va yôd ha lipouzat va lèz,
Dêbri patatez, stripou ha souben ar c’hrampoez,
Mes en eur gonta dêc’h va nebout talantchou,
Ne ouzòn qet penos ec’h ancounac’hàn va rimou
Deboujour dêc’h-hu oll, tud a enor, pini
Zo deut a galon vad da guichennic ho ty,
Gant eur joa ar vrassa d’ho saludi brêmàn ;
Eus a greiz hor c’halon ni a zo deut amàn.
Saludi a reomp ractal ho personach,
Gant an oll respet a gommand ho pizach ;
Hac er memes amzer hoc’h oll gompagnunez

Rac assur tud vrao oc’h aman assambles.
Me a fell dìn bremàn sur, va mignon,
Gouzout eus a betra e zèo qestion
Rac ma velàn eur seurt banden
Eru da doul va dòr d’am zurpren.
N’en deo qet evit ho surpren,
Nac evit ober poan da zen
E zomp amàn en em assemblet
Ével ma ve eur vanden denved :
Ni a zo o clasq da eureuji,
Ha na ellet qei da ziferi,
Dindan boan da bêa an amand,
Hac ar mizou antieramant.
Eun ouades am boa tennet,
Hervez ma zeo demp rapportet,
Disqennet e zeo en ho ty,
Rac-se rentit-y deomp-ni :
C’houi a renq renta deomp rêzon
Demeus anezi, va mignon.
Ni zo e clasq eur plac’h yaouanq,
Mar qirit ni e hanvo dêc’h franchamant :
He hano eo Guillemet ar Maout,
Nac evit beza pried da Charles ar Zaout,
Da zont d’an ilis da eureuji
Evit êchui an demezi,
Guillemet ne vouie qet
E voa hiryo deiz he eured,
Hac a zo êt d’ar vêlin da oza qerc’h :
Rac-se redit, mar qerit, var he lerc’h,
Hac ar meliner a voar parlant
Hac a ambus ar merc’het yaouanq.
Aon a meus na rancac’h reir e gortoz,
Abars mac’h êruo e vo noz.
M’am bo ar bermission
Da antren en ho ty, va mignon,
Me lavarfe pront, hep diferi,

E penn ho tol va c’hevredi.
Pa voan êru e penn ar c’harz,
Me he c’hanaveas eus he c’hoarz ;
Hac he c’hlêvis o lavaret :
Eru ê davidòn va muia caret.
P’on eus ho qüelet o tont da dal an ty,
E sònje dìn e voac’h eur vanden merdeadi
O vont da Vrest evit eun ambarqamant ;
Pe zoudardet o clasq o lojamant ;
Pe otramant eur vanden stoupêrien
Eus a Scrignac, Locqueffret pe Berrien.
Sic clamabor et meditabor ut columba.
Evelse e comzàn, pa ven o latina.
En han’ Doue, n’hon daleit qet,
Rac ar sacrist a zo goel bresset ;
Me sònch dìn eo eus a urz Sant Cripin,
Hac e car dijuni mintin.
Qer brao, qer coant oc’h eus comzet,
Va mignon qer, ho refusi nallàn qet :
Me a ya da ober eun dro dre va zy,
Da c’hout a me gavo dêc’h ho qevridi ;
Ha pa rìn-me eun dro var va zeul,
E teuy eun dra benac d’am heul.
Cetu amàn eur vaouez coant,
Ha ne deo na cos na youanq,
A dle ravissa ho speret
Gant he fresanç hac e guenet.
Ar vaouez-ze zo perc’hennet,
Emedi al liou var he beg :
Hac e deus bet choazet he far,
Ha ne ra fors piou zo var vâr.
Me a gred e deuz dija poazet
Eus an darbot he biziet :
Cassit-hy ganêc’h var he c’his,
Rac aon ne defo droug-aviz.
Terrubl meurbet oc’h dificil ;

Va mignon, ho complimant zo civil.
Cetu amàn eur plac’h yaouanq,
Hac e deus eur galon ardant,
Hac a dle plijout d’ho fantazi,
Pe oc’h dies da gontanti.
Ni hon eus-y diguemeret,
Ha ne qet da veza refuset ;
Pa vo êru an heur, mar car,
Ni zo prest da choas dêi he far.
Mes eun all a c’houlennomp c’hoas,
Hac a zo blesset en ho scoaz,
He zervicher qercoulz hac hi ;
Eru eo ar poent da zepari.
O presanti dêc’h an objet
Pini oc’h eus dija goulennet,
Ouspen, ni o choulen pardon,
Mar hon eus bet divizion.
Didostait ta, den a zevez,
Pa ziguemeret ho mestrez ;
Ni he ro dêc’h a galon vad,
Gant cònje he mam hac he zad ;
Cònje he c’herent hac he lignez,
Da antren ganêc’h en priedelez.
Pedit Jesus, roue an Tron,
Da rêi dêc’h e venediction,
Ha d’hoc’h asista evel a eure
En eured Cana en Galilee.
Cunduit eur vuez vat,
En doujanç Doue, hervez ho stat,
Ha goude monet da repos
Gant an Ælez er Barados.
Parlant a rit qen delicat
Evel pa vec’h eun avocat ;
Ma vec’h pignet en eur gador,
E sònchfet vec’h eur predicator.
Manific ec’h ouzoch cozeal

En hoc’h avantach ordinal.
Ganêc’h m’en em gav estonet,
E qever an nôr êruet ;
Rac me a gavje dêc’h-hu güell
Chom en tu all d’ar porastel,
Bete gouzout ha ni hor bije
C’hoant d’ho receo amâ hirie.
Evel ma zoc’h tud a enor,
Deut demeus a zirac va dôr ;
Ne fell qet dìn ho rebuti,
Na qen nebeut dont d’ho choqi ;
Clêvet a garfen libramant
Petra eo sur ho santimant.
Evit ne ellot qet ignori,
Clêvit bremàn va c’hevredi :
Me gonto dêc’h a boent a boent
Evit petra omp deut en hent
Ha mar domp amàn arrêtet,
Ec’h ouzoc’h erfat ar sujet.
Achui ràn va c’homplimant,
Respontit dìn presantamant :
Troit ho qein hac hit d’oc’h hent,
M’ho cav qer sot bremàn ha qent ;
Reir e chommit d’ober demp brut :
Torchit ho peg hac hit d’ho clud.
Hervez m’ho clêvàn o parlant,
Oc’h eus dresset ho complimant :
Me gred oc’h bet er c’hademi,
P’otramant er philosophi.
M’am be c’hoant doc’h antreteni,
Me ho pedfe da antren en ty.
Clêvet a garfen ar rêson
Deus a betra eo qestion,
Pa ho qüelàn deut en eur vanden
Da guichen hon ty d’hor surpren.
Eur joa vras a meus-me meurbet,

Compagnunez, ouz ho qüelet,
Ha mui a meus certenamant
P’o clêvàn qer caer o parlant,
Rac ne deu demeus ho qinou
Netra en oll nemet rimou ;
C’houi c’heus grêt ho tiscoursiou tout,
Birviqen ne elfec’h manqout ;
C’houi c’heus eun ton qen eloqant,
Qen delicat ouzoc’h parlant,
Na oufen qet o pez fêçon
Dont da gonta dêc’h va rêson.
Abars qement-mà, va mignon,
E carfemp gout ho commission,
Hac e contfêc’h demp ho toare,
Vit petra oc’h deut da vale.
Mar deo qementse d’ho souhet,
Ne vezot pell refuzet ;
Oblijet omp vel ma zeo güir
Da zisclêria dêc’h hon dezir.
C’hoant bras a meus en assuranç
da gaout an enor eus ho presanç.
Grit buan dezàn azea,
Aoun a meus ne deu da sempla.
Roit eun taç hac eur voutaill
Da zigrassi mad e gorsaill.





COMPLIMANT TOL.


M’ho suppli, compagnunez, da bresta ho silanç
Evit ma parlantìn bremàn en ho presanç.
Gant enor, d’ho yec’het me a deu da eva,
Hac abeurs ar Vreg-Yaouanq en ho trugarecàn,
Po c’heus bet ar vadelez d’he beza asistet
En devez a hirie ebars en he euret.
Hac evit oc’h oblija ec’h evìn davantach.
Da yec’het nep zo roet gant Doue dêi evit partach.

D’ho yec’het, Greg-Yaouanq, eus a beurs ho pried ;
Doue da rêi dêc’h ar c’hraç d’en em garout parfet,
ha da rêi dêc’h er bed-mâ qement a souhetet :
Me a reqet dêc’h c’hoas asistanç un Doue,
Evel güeachal en eured Cana en Galilee.
Me a ev d’ho yec’het oll eus a greiz va c’halon,
Doue da rêi demp oll e venediction.
Ne ancounac’haomp qet ive an anaon decedet,
Tad, mam, ha breur, ha c’hoar, eontr, moerebezet,
P’o deveus bet ar soign, pa voant en o bue,
Da zovetât da bepini ac’hanomp e zanve.
Chommit, compagnunez, pepini en e blaç,
Evit caout ar vadelez d’asista oll er graç.
P’on eus dêbret hac evet, trugarecaomp Doue
Da veza roet deomp-ni diouz hon necessite.
Excus-ta, compagnunez, a c’houlennàn bremàn,
hac aon n’am be qet plijet da speret peb unan ;
Gouscoude e cred dìn ne meus lavaret netra
Hac a choqfe nicun eus ar re zo amâ.
Me a ev d’ho yec’het oll eus a greiz va c’halon,
Ouz ho pedi da zêbri ha da eva en ho tiscretion.
Chommit eta pepini qeit ma vo e volonte ;
Me n’òn qet deut amâ da rêi da zen e gònje.
Graç demp oll da vea bepret en joaüstet :
Doue da gonservo qement zo eus va c’hlêvet ;
Doue d’hor c’honservo amàn var an douar :
Graç demp d’en em velet eun deiz ebars er gloar.

Discours evit eun Eured.

Salud dêc’h, compagnunez, gant güir humilite,
Pa meus bet an hardisson da zont en ho pete.
Perac na meus-me qet eloqanç Ciceron,
P’otromant ar furnez en devoa Salomon !
Perac na meus-me qet guinou ha têod alaouret
Da barlant en ho presanç evel ma veritet !
Me zo deut amàn hirio gant va c’hompagnunez,
Evit goulen ouzoc’h, mar be ho madelez,

Eur recit mad benac eus an deiz a hirie :
C’houi oc’h-unan a ell accordi dìn qememse.
Tennet hor boamp d’ar sord da glasq ar savanta,
Allas ! hac e zeo digüezet gant an ignoranta :
Mes dre ho madelez, ho sqient, ho prudanç,
M’ho ped d’am excusi demeus va ignoranç.
Me a c’hoarve ganén-me evel ar stereden,
Pa deu an eol da bara a goll e sclêrijen ;
Me zo n’em gavet amàn evel en eur jardin
Güernisset eus a lore, a roz, a durcantin,
Hac en e greiz e zeus bet maguet eur femelen
Brillantoc’h e-unan eguet ar gaëra fleuren.
Me garfe dont a benn da ellout he zurpren ;
Va speret zo troublet, n’òn qet evit compren.
Gant enor e saludàn an oll gompagnunez ;
Peoc’h Doue d’ar re veo, d’an anaon silvidiguez.

Brêmàn ec’h antre da vit ar Plac’h.

Salud dêc’h, Plac’h-Yaouanq, demeus a bers Doue,
Me a zo deut d’ho cavet en devez a hirie,
Evit gouzout diganêc’h ha c’houi zo preparet
Da zont da effectui ar pez a zo promettet.
Deut da c’houlen bennos eus ho tad hac ho mam,
Evit dre guementse beza dirac Doue divlam ;
Rac dre e c’hourc’hemen en deveus ordrenet
Respeti dreist peb-unan nep ho deus hor maguet.
Sellet e meus en ty-mâ ha nep tra ne meus cavet
A guement am oblichfe da fournissa dêc’h merc’het.
Disqeuzit demp eta brêmâ ho contrajou
Hac er memes amzer ive hoc’h oll titrou
Rac me anzav òn eun nebeudic incredul,
Rac va rêson a meus evit bea dissimul,
Nêo qet brao güelet Yan ar Maout
Gant eur bezel en craou ar zaout,
Eur pez corn butun en e c’hinou,
Ha goall gaillaret oll e vragou.

Ni ne glascomp nemet eur vaouez,
Hac hor bezo ni assur abars paouez ;
Rac goall difêçon eo güelet eur goas
O vont d’an ty forn gant e doas ;
Ha dreist-oll, pa ya da oza e guerc’h,
E veler ar merc’het o redet var e lerc’h.
Eleal, emàn a zo eur potr lippet mad,
Coulz evel ma voa e vam hac e dad ;
Rac e vam gôs coulz hac e vam iou
O devoa, a gredàn, peder vorzed o diou.
Me ho suppli, en graç, compagnunez,
Hac o ped a galon da gaout ar vadelez,
Mar teufe dìn-me dont da vancout,
Deut d’am sicour dre oc’h oll gallout.

Pa êruer ouz an Daul.

Arça, Compagnunez, mar teuàn d’oc’h arrêti,
Bezit ar vadelez da zont d’am excuzi.
Stoùomp eta d’an daoulin da c’houlen ouz Doue
Ma teuyo d’hon asista en devez a hirie.
 

bréman e taouliner.

Doue oll buissant en ên evel en douar,
Ma meus hoc’h offancet, e meus eur güir glac’har :
Cetu me d’an douar dirazoc’h prosternet,
Ma vo ho madelez accordi dìn eur reqet.
Ho pennos, va Doue, eus ar pez a c’houlennàn,
Evel ho servicher a zo daoulinet amàn,
Evel goechall Sant Yan, pa vadeas hon Zalver,
A glêvas en êr eur voez abeurs an Tad Eternel :
« Ennes e zêo va Mab, an hini muia caret ;
» Va c’hraç ha va bennos a vo gantàn bepret. »

Brêmàn e sao hac e tistro eus ar guerent.

Goude beza goulennet benediction doue,
E felfe dêi caout brêmàn hini e zud ive :
Cetu ho merc’h d’an douar dirazoc’h prosternet,
O renta dêc’h-hu hommach, evel ma zêo dleet :

Goude bennos ar Verc’hez, aroc mont eus an ty,
E c’houlen a vouir galon diganêc’h hoc’h hini :
Or ta …………… deut eta a vouir galon
Da rêy gant ho puguel ho penediction.

Evit ar Vam.

Ha c’houi, mam garantezus, pini deus he maguet,
Eur mennat a c’houlennàn, ha n’am refuset qet :
Ho pennos a c’houlennàn ganêc’h evit ho puguel,
Evel a eure gueachal ar Patriarch santel.
Bennos breudeur ha c’hoarezet ive pareillamant,
Hini paeron, maeronez, mar maint amàn presant,
Hini ar Zent, an Æles, hac hini ar compagnunez
O deus grêt dêi an enor d’e asista en e devez.
Ha brêmàn demp, en hano santel a Zoue ;
Goude renta hon hommach, oblijet omp da ze.

Brêmàn e ve lavaret eur Bater, eun Ave hac eun De Profundis, hac e saver er za.

Savit ta, Merc’h Yaouanq, da zont da dy Doue,
Evit effectui en antier ho promesse,
Da virat fidelite bete fin ho pue,
Ha goude d’en em velet en barados Doue.




DISCOURS
Pa roer eur Plac’h, hac evit êchui tout.


Qemerit, va mignon, eun nebeudic courach,
Rac êru oc’h souden er fin eus ho peach ;
Ha ne c’houlennàn qet mui nemeur a dermen,
Rac me vel eo êchu brêmàn va zrajadien.
Me a garfe certen demeus a greiz va c’halon
Caout assur eun nebeut a gonsolation.
Didostait amàn en qichen d’an treujou,
Ha me a royo dêc’h gant joa vras eur c’hêlou

Pehini a ellàn credi certenamant
A rejouisso meurbet ho santimant ;
N’en dêo qet eur c’hêlou hep netra qen,
Rac cetu amàn dirazoc’h suramant eur femelen
Pini a lavarac’h, va mignon,
A blije meurbet bras d’ho calon.
Cetu amân, me gréd, eur femelen
A zo caeroc’h eguet eur chinofen,
Roz, na fourdilis, na levant :
Speret an oll a rent contant.
El lec’h ma ve tevalijen e laqa pep seurt sclêrijen :
Caer eo evel eur stereden, qer caer hac ar verelaouen.
Roit an dorn deo dezi brêmàn,
D’e c’hass ganêc’h demeus an ty-màn :
Ha mar er grit, clêvit eur guer :
Diouallit eus ar goalinier
Eus a zorn Doue oll-buissant,
Da bunissa an dud mechant.
Me a lavar ar goalinier
Eus e furor hac e goler.
Da lavaret eo, ar c’hollou,
Ha calz demeus a valeuriou
Pere a eller da evita
O veva gant graç Doue er bed-mâ.
Bevit bepret ho taou en doujanç Doue,
Hac ho pezo certen peb seurt prosperite.
Peguement benac hep nep douetanç,
Ec’h ouzoc’h mad qement-se en avanç.
Gant ho permission e lavarìn brêmàn
Ebars eur guer pe zaou, va zelaouit amàn :
Qemesqet eo, allas ! atao buez an den,
Bepret demeus a joa hac a anqen ;
An tieguez zo eul lest,
Exposet da veur a dempest :
Ret eo dêch beva en güir union,
Ha Doue a roy dêc’h e venediction.

Peb den zo gant Doue choazet
Evit beza eürus ha salvet.
Hoguen ret eo goude goulen
Beva just en güir Gristenien.
Contemplit ar societe
A zo entre an douar hac en êe ;
Goulennit bepret digant Doue
Courach ha nerz d’ho liberte
Evit ober peb tra parfet,
Evit se e zoc’h digasset.
Retorn a ranqit adare
Da renta cont da eun Doue.
Gout a rit, ne zouetàn qet
N’oc’h eus eun adversour er bed.
An adversour-ze eo Satan,
Siouas deomp oll guittibunan !
Pa falvezo d’an drouc-speret
Dont da debochi ho speret,
Respontit : Abrenuntio,
Ha lavarit : sinet eo.
An Autrou-Doue eo ar brassa ;
Enor ha gloar rentomp dezà,
Evit goude beza labouret,
Hervez hon nerz hac hor yec’het,
Pa c’hefet divar an douar,
E recevet eur gurunen er Gloar.
Ouspen, er goalen a eured
E zeo ar garante comprenet ;
Dre ma zêo rond ar voalen,
Ne all finissa birviqen.
Ne zeus fors absolumant :
Ret mad eo da eun den parlant ;
Ma ne respontomp qet an dud,
E teufent da lavarat e zomp mud.
Sònjet hon eus da ober voell,
Sevel amàn eur zantinel,

Hac a vo grêt en form eun ty,
Evit respont d’an dremenedi.
Ha c’houi ive, va mignon qèz,
Mar oc’h eus marc’hadourez
Pe da brena, pe da voerza,
Partiit buan gante da guenta,
Evit Montroulez pe Gastel,
Hac e profitot ne vo qet pell ;
Eno e cafot honestamant
Peadra evit hoc’h arc’hant.
Eur garante evel honnes
Ne all qet finissa james.
Credi a ràn hoc’h eus pedet
Jesus hac e Vam beniguet
Da asista en hoc’h eured.
Demp-ni bremàn, compagnunez,
Da offr hor peden assambles
Er sacrifiç an oferen,
Da c’houlen graçou souveren ;
Hac evidomp hac evite,
Goulennomp graçou ouz Doue.
Er fin, o tont da finissa :
Dalit he dorn, croguit ennâ ;
Promettit dezi fidelite,
Hac hi a brometto dêc’h ive.
Cetu aze he dorn deo
Doue dre e c’hraç d’ho cunduo.


FIN.




DEVERIOU AN DAOU BRIED


AN EIL EN ANDRET EGUILE


————


(Chabistr 6 eus ar C’hod Civil.)


An daou Bried a dle chom fidel an eil d’eguile, hac en em zicour an eil eguile.

An ozac’h a dle difen e vreg, hac ar vreg senti ouz he ozac’h.

Oblijet eo ar vreg da ober he demeuranç gant he ozac’h ha d’e heulia en qement lec’h ma caro chom.

An ozac’h a zo oblijet d’he diguemeret en e dy ha da fournissa dezi qement tra a zo ret da gaout evit beva hac en em wisqa, hervez e c’halloud hac e stat.


————


Cetu aze ho teveriou :
Dalc’hit mad dê da bep heuriou.
Mar bezit fidel entrezoc’h,
Ar barados a c’honezoc’h.