|
An Tad
Mar deo Eoulmed eo a glaskit
Kit d’ar maner davit ;
Amañ, war ar maez, ganeomp-ni,
N’eus nemet piked ha brini,
Hogen eur gaou a livirit,
Eun dra all a glaskit.
Ar Jubenn
Ni zo o klask louzeier fin
Da lakat ’n hor jardin,
Eun louzaouenn mat ouz ar bles,
Graet gant birou ar garantez,
Hag e klevis dec’h diweza
Her c’havjen er gêr-ma.
An Tad
Ar flourdelizenn a glaskit
Siouaz ! d’eomp aet eo kuit ;
Ema breman e Kemperlé,
Er gouent o veuli Doue,
Koantoc’h eged eur bodig roz
E liorz ar baradoz.
Ar Jubenn
Nann, va mignon, n’ho kredan ket,
Doue en deveus graet
Evid ar vered an ivin
Evid al liorz al louzou fin
Hag Annaïg da laouenaat
Kalon eur pried mat.
An Tad
Evel an dour, war ar prajou,
E tired ho komzou.
Treuzi a reont dor an ti-ma,
Evel ar mel eun tamm bara ;
Da beurober ho kefridi,
Den yaouank deut en ti.
|
