Adlennet eo bet ar bajenn-mañ
BUHEZ HA MARO AR C’HOUER BRETON
(IEZ TREGER)
D’ANN OTRO DARBOIS DE JUBAINVILLE,
Den gwiek en iez ar Vretoned.
I.
War ribl un dosenn c’hlaz un de ’oann gourvezet,
Etouez ar ieod bleunek hag ar radenn kuzet.
Ann amzer a oa kaer, dre-holl bleunio c’hoez-vad ;
Ar saout hag ann oc’henn ’beure d’ann traon, er prad.
A-dehou hag a gleiz ’klewenn o tiroc’hel
Ar mekanik dorner ; dem-dost un durzunel
A gane uz d’ar ster, kuzet ’touez ar brankou,
Ha ma fepn a oa leun a bep rum hunvreou.
