Hanter varo kazi gand ann naoun, ar skuizder,
Enn eul leac’h dibabet, d’ann noz, p’en em gaver,
Louz holl gand ar vouillenn,
War eur c’holo fleriuz astennet war ar pri,
Araok en em daoler eur mare da vori,
Me lavar eur bedenn.
Ann hini lavarenn gwech’all, noz ha mintin,
P’oann c’hoaz eur bugelik, war bennou va daoulin
Ha va daouarn e kroaz,
Ar bedenn desket d’in gant va mamm em c’havel
Hag a deue da gerc’het enn eur c’halir, eunn El,
Gand eul levenez braz.
Me bed Mestr ann Elez ha Mestr ar zoudarded
Da gemeret enn Env eneou va mignouned
Maro war an dachenn,
Hag pa’z eo gwir, siouaz ! ne c’hallint er bed-ma
Beza didamallet, Doue, ro da vihana
D’ezho da gurunenn.
Goude, me zouj er gear, er c’hougn goullo, siouaz !
Oc’h pehini va mamm a zell gant glac’har vraz,
O ouela d’he bugel,
Hag em c’housk e kav d’in gwelet va mignounez
O tont beteg enn-oun, gwisket vel ar Werc’hez,
Gant diouaskel eunn El.
