An Ankou e c’halvas e-pad eun amzer sioul,
Eun oabl sklerijennet, eun dremwel digoumoul,
Eun dervez dereat ’vit beach eun ene
Sur da reseo du-hont gwel an Aotrou Doue.
Da veure, antronoz, e holl barrozianiz,
Kement e ambrouge, o kuitât an iliz,
A glevas en avel a-us da Yun-Elez,
Da goajou Kergeven, da reier ar Menez,
Eur voubouenn glemmus o lake a-unvan
Gant ar gerent galvet evit e dremenvan.
Ar Bed hag an Nenvou, ’n eun huanaden hir,
A veske o glac’har ’vit gouela d’eun den gwir.
