Pajenn:Perrot - Bue ar Zent.djvu/901

Eus Wikimammenn
Sauter à la navigation Sauter à la recherche
Adlennet eo bet ar bajenn-mañ
29 Kerdu
901
sant thomas kantorberi


Navet devez warn-ugent a viz Kerdu


Sant Thomas Kantorberi
Eskob ha Merzer



Ar zant-man a zo ganet en kêr Londrez, en Bro-Zôz. E vamm a oa eur gristenez vat hag a zeskas d’ezan abred anaout ha karet an Otrou Doue. Da gentan e tarempredas skoliou ar vro, ha goude e oe kaset da Bariz evit studian al lezennou.

Dizro d’ar gêr, e teuas da vezan sekretour eun dijentil diwar ar mêz, hag a dremene e holl amzer o chaseal. Evel ma veze bepred gantan, Thomas a deuas da vezan losk en servij Doue. Mes eun devez, o vezan lammet en eur stêr evit pakan eul lapous, e oe dare d’ezan bezan flastret dindan eur rod-vilin ; kredi reas d’ezan ne oa bet sovetaet nemet dre virakl, ha diwar neuze, e reas e zonj da vezan gwelloc’h kristen.

Goulenn a reas bezan digemeret e-touez an dud a iliz, ha nebeut goude, arc’heskob Kantorberi hen greas avieler hag hen kemeras evit e vikêl-vras. An holl n’o devoe nemet meuleudi da rei d’ezan, rak ar zant a rê eus ar gwellan an holl labouriou a veze fiziet ennan.

O vezan klevet hano eus e zantelez hag eus e spered kaer, roue Bro-Zôz, Herri II, a roas d’ezan ar garg kentan en e rouantelez. N’en devoe ket a geun, rak biskoaz den ne ziskouezas muioc’h a furnez hag a lealded. Gant ar c’halloud laket etre e zaouarn, ne glaske nemet eun dra : ober vad d’an holl, ha dreist-oll d’an dud dister ; ha goude bezan labouret epad an de, e tremene eul loden vras eus an noz o pedi.

Pa varvas arc’heskob Kantorberi, Thomas a oe hanvet en e blas, en despet d’e bedennou ha d’e zaerou. Diwar neuze, e vevas evel eur manac’h ; dougen a reas bepred dindan e zilhad eur gouriz reun ; sevel a rê da ziv heur diouz ar mintin evit lavaret e ofis, ha goude e walc’he o zreid da drizek paour, hag ec’h ee d’ober eur c’housk-all. Abred e veze adarre war zao, ha goude bezan lavaret e bedennou ha studiet ar Skritur-Zakr, ec’h ee da welet an dud klanv ; ha da nav heur ec’h oferenne, ha ne gemere tamm arôk ter heur.

Ar pab a rê kalz a stad anezan, hag hen diskouez a reas en konsil Tour. Thomas a yeas d’ar c’honsil, ha pa zigoue-