Pajenn:Perrot - Bue ar Zent.djvu/396

Eus Wikimammenn
Sauter à la navigation Sauter à la recherche
Adlennet eo bet ar bajenn-mañ
396
28 Mae
sant augustin a gantorbery

a rejont da brezek a bep tu ar c’helou mat. Eun tammik iliz vihan chomet en he zav a-zilerc’h ar Vretoned a oe o iliz kentan. Prezek, oferennan ha badezi a rent enni.

Ne oa ket bla c’hoaz ma oant eno, pa c’houlennas Ethelbert ar vadeziant ; eleiz a gemeras skouer warnan, ha da oueliou ar Pantekost 597, dek mil Sôz a oe badezet en stêr an Tamis.

Dre anaoudegez vat, ar roue kristen a roas d’ar venec’h e balez hag eun dachen tro-war-dro a oa enni eun templ pagan ; eus ar palez e oe grêt eur manati hag eun eskopti.

Sant Augustin, sakret eskob en Arl, a oe kentan abad ha kentan eskob Kantorbery. Eus an templ e oe grêt eun iliz, ha, stag-a-stag outi, eur manati-all en enor d’an Ebestel Per ha Pol.

Ar pab Gregor a roas da eskob Kantorbery ar gwir da zougen ar pallium, pa vije oc’h oferennan, hag hen greas arc’heskob war Breiz-Veur a-bez. Koulskoude, eskibien Bro-Geumru [1] ha Bro-Gerne a chômas hep plegan d’ezan, dre ma c’houlenne oute prezek ar fe d’ar Zôzon : tenn e kavent digeri doriou ar baradoz da dud hag o devoa laeret digante bro goz o zadou. An arc’heskob a gavas muioc’h a zentidigez abeurz e Zôzon badezet.

Kelennet mat oa bet gant sant Gregor, gwir eo, war an doare d’o c’hemer :

« Arabad eo, en devoa lavaret ar pab-ze d’ezan, diskar templou an idolou ; diskaret hepken an idolou a zo enne, binniget aneze, savet enne ôteriou, laket enne relegou ; en doare-ze, an dud a deuio buhannoc’h da adori ar gwir Doue el lec’hiou m’int boaz da vont dija.

» Hag evel m’o deus ar c’hiz da lazan eleiz a ejenned, pa ginnigont sakrifisou d’an drouk-sperejou, pa vezo gouel an dedi, pe gouel ar verzerien, e c’halllont sevel lochennou tro-war-dro d’an templou troet en ilizou, hag ober leinou enne etreze ; mes elec’h lazan an anevaled en enor d’an diaoul, e lazfont aneze evit o dibri, hag e trugarekafont Doue a ro d’eze o gwalc’h ; en eur lezel gante, en doare-ze, urz da gemer eun nebeut plijaduriou korf, e teuer gwellan a benn d’o zrei war ar plijaduriou ene.

» N’haller ket krennan pep tra pa ve d’ober gant eneou goue ; n’eo ket a lammou bras e saver war gern eur mene, mes a gammajou bihan. »

Sant Augustin a varvas d’ar 26 a viz mae 604.

  1. Cambrie ou Pays de Galles.