Adlennet eo bet ar bajenn-mañ
10
AN DIV ZREMM
MALO
Da gousket, ...da goll gant ar c’housk, mar gellan, soñj va c’haezh dremm euzhus !... pelec’h emañ ar melezour ?
AR VAMM
N’ouzon ket.
MALO
N’ouzoc’h ket, n’ouzoc’h ket !... Va Doue ! Hag ez on ’ta ken losket, ken dizremmet, ken vil-se ?
AR VAMM
Va faour kaezh Malo !
MALO
Chom a rit mut. Ne lavarit ket nann. Echu eo ’ta ar vuhez evidon... Koulz eo din mervel neuze !
AR VAMM
Malo !
MALO
N’ho pet ket aon. Mervel evit ar bed hepken, mervel evit ar re all, an hini am eus karet, ...ne lavaran ket se evidoc’h, rak c’hwi a zo va Mamm !
AR VAMM
Ne gomprenan ket.
MALO
Eo ! Eo ! Kompren a rit ! n’eo ket ret distagañ hec’h anv.
AR VAMM
Perak lavarout traoù ken trist, Malo ? Ha n’oc’h ket, Rozen Pavek ha c’hwi, grataet an eil d’egile ?