Aliettic ar Palefre,
Brawa plac’hic ’zo er c’hontre !
Ma ven-me ganthi o cousket,
Me ve gant ma muia caret.
— Ma c’heginer, ma fotr a di,
Kerz evit-on betec en-hi,
Ha lavar d’ezhi, mar n’hen goar,
Eo plac’h caret war an douar.
— Debonjour d’ac’h-c’hui, Aliet.
— Ha d’ac’h, keginer, p’ oc’h deuet ;
— Me ’zeu da zigass d’ac’h lizer
Digant Bernez, ho servijer.
— Trugarez ewit ho lizer :
Debret boed hac it c’hui d’ar gêr ;
Debret c’hui boed, ha retornet,
Lâret d’ho mestr on dimezet...
— Debonjour d’ac’h, ma mestr otro,
D’in-me a zo chanchet kezlo ;
D’in-me a zo kezlo chanchet,
Aliettic ’zo dimezet.
— Ma c’heginer, ma fotr a di,
Kerz evit-on d’ar marchossi,
Ha dibres d’in ma ankane,
Ma ’c’h in da c’hoûd ar wirione.
— Debonjour d’ac’h-c’hui, Aliet.
— Ha d’ac’h-c’hui, Bernez, p’oc’h deuet,
— Kezlo newez, am euz clewet,
Credi ’ve gwir n’am eus ket gret.
— Ar c’hezlo c’hallfe beza gwir ;
An holl n’ ho deuz ket ho dézir,
Ha me am eus eur breur cloarec,
Mar clewfe-ze, a ven làc’het !
