— Ma merc’h, iaouankig c’hoaz ez hoc’h,
N’hallan ket dimi ac’hanoc’h ;
Ho ligne euz a beurz ho tad,
Ma merc’h, na gavfe ket se mad.
. . . . . . . . . . . . . . . . . . . . .
. . . . . . . . . . . . . . . . . . . . .
Paourienn he faroz a oele,
Na gavent den ho c’honsolje ;
Na gavent den ho c’honsolje,
Met ar benheres, honnes ’ree :
— Paourienn ma faroz, n’ oelet ket,
Deut da Gastelgall d’am gwelet,
Me ’roïo ’nn aluzenn bemde,
Ter gwez ar sûn ar charité.
— Ann aluzenn na rofet ket,
Charité c’hoaz na lâran ket ;
Me na bâdfe ket ma moïenn
Da roï aluzenn d’ar baourienn.
— Heb diverra tamm ho moïenn,
Me ’roï aluzenn d’ar baourienn :
Ur marchosi ’zo ’n ti ma zad,
Aotro ar Ronz, dalv he holl vad…
Setuint dimêt, eureujet,
Mont ’ra d’ Gastelgall gant he fried.
Kriz ’vije ’r galon na oelje,
En Keroulaz nep a vije,
O welet ar benheres vad
O pokad da vein ti he zad,
O lâret : — Adieu, Keroulaz,
Birwikenn en-out na ran paz ! [1]
- ↑ C’est dans « Les Antiquités du Finistère » de M le chevalier de Fréminville, seconde partie, page 203, qu’une version de cette ballade a été publiée pour la première fois.
