Pajenn:Luzel - Bepred Breizad.djvu/180

Eus Wikimammenn
Sauter à la navigation Sauter à la recherche
Adlennet eo bet ar bajenn-mañ



YVONA KERIZELL.


————


En Kerizell ’zò eur plac’hik,
He c’hanò Mòna, pe Mònik :
Er vrò na gavfet ket he far ;
A greiz ma c’halon me he c’hàr.
 
N’en eûz ket er bed a gomziou,
Bars en neb iez, nag a zòniou,
Ewit làret, herve ma c’hoant,
Pègement ez é fur ha koant.

Kaeroc’h é ’wit ann heol, pa bàr,
Euz ar mintinn war ann doùar,
Ha freskoc’h iwé ’wit ar ròz,
Pa ve gloebiet gant ar gliz-nòz.