Adlennet eo bet ar bajenn-mañ
DISTRO ANN NEWEZ AMZER.
————
Ar mintinn-ma, ’vel ma saviz,
Eùn heol ken laouenn a weliz ! —
Ha me tiskenn d’am liorzik,
Skanv ha zeder ma c’halonik.
Oh ! Doue, koanta da vleuniou
’N touez ar ieot-glaz hag an dèliou,
Ré a beb-liou, ha ruz ha gwenn,
Ré c’hlaz, hag iwe ré velenn !
Ma zeblante d’am daoulagad
Ewit lavaret d’in : — « Deiz-mad ! »
E savent ken koantik hò fenn
Hag è c’hoarzent pa drémenenn.
