Pajenn:Lescour - Telenn Remengol.djvu/80

Eus Wikimammenn
Adlennet eo bet ar bajenn-mañ


Va mabik, va elik Doue,
Va elik dous, va c’harante,
Te a zo koant enn da gavel,
Koant ha laouen, evel eunn el !

Ar vuez-man a zo c’houero,
Karget a boan hag a zaero ;
Doue roi d’id, va bugel paour,
Feiz, esperanz, eur galon aour !

Eur galon aour ha karantez
Da dremen leal da vuez !
Ra vi bepred karantezuz,
’Vel ma oa ar mabik Jezuz !

Petra vezi war ar bed-man ?
Evel da dad eunn den a boan !
Marteze vi barz pe beleg,
Soudard, martolod pe tieg ?

Doue hep-ken oar ann dra-ze,
Ha ra vo gret he volonte !
Er joausted hag enn anken,
Bez, va map, stard enn he lezenn.