Hiniù duchentil a Vro-Gall
É hoarh doh hun guskemanteu
Hag, allas ! mar a Vreihad dall
E goll ar pen get ou cheleu
Hag e daul “chupen” e dadeu.
En Ankeu, digor e askel
E glah en tu de skoeïn arnamb,
Ma er gizieu kouh e verùel :
Dihunamb, pautred, dihunamb !
Hiniù duchentil a Vro-Gall
Hun flastr get ou lezenneu kri,
Guerhet ou haloneu d’er Fall
Ind e gaz en treu kaer memb-ni,
Hag eneb d’he ne saù hanni.
En Ankeu, digor e askel
E glah en tu de skoein arnamb,
Ma er frankizieu e veruel :
Dihunamb, pautred, dihunamb !
Hiniù duchentil a Vro-Gall
Get ur horvad arfleu e lar :
« Konzet galleg el er re ’rall ! »
Ha kavouit e rer ar hun doar
Tud ag e zilausk ou lavar.
En Ankeu, digor e askel,
E glah en tu de skoein arnamb,
’Ma iez hun tadeu e verùel :
Dihunamb, pautred, dihunamb !
Hiniù duchentil a Vro-Gall
En ou hevelenneu e skriù :
« N’en des na Doue, na bed arall ! »
Ha lod, doh ou hleuet, e viù
Hemb pedein Doue, el loned gouiù !
En Ankeu, digor e askel
E glah en tu de skoein arnamb
Ma er Fe kristen e veruel :
Dihunamb, pautred, dihunamb !
Hiniù, duchentil a Vro-Gall
E venn goaskein oll en treu-se
Agoust m’ou des groeit gueharall,
Inour Breih, hag he nerh eue :
Ha ni e bleg penn dirag he…
En Ankeu, digor e askel,
E glah en tu de skoein arnamb,
« Ma hun Mam-Vroig e veruel :
Dihunamb, pautred, dihunamb !
