3.° Doué a examinou en œvreu mat hun bou groeit. Ol é veint pouiset bet en deuéhan manquemant, en disterran défaut : ean a examinou en ol plégueu ha displégueu ag er gonsciance ; ean a uélou bet er fond en dondæt ag er galon. Pihue a éellou hum guhein doh ur Juge a uéle tout ? Sant Paul a lare ne hum gave cablus a nitra, ha neoah ne gred quet laret é ma pür ha glan dirac Doué : ean a gasti é gorf hac a ra ur benigen rust, guet eune a vout collet, goudé en devout perdéguet d’er-réral hum sauvein. Mar dougeai Sant Paul er Jugemant, mar creinai Sant Hilarion, péguement é teliamb-ni creinein, goudé er græceu hun nès dispriset, hun pèdenneu fal laret, hun Overenneu cleuet hemb dévotion, hun Hovézioneu hemb contrition, hun Hommunioneu hemb profit, Perdégueu, Retraideu, Missioneu hemb hout gùel : ni, Crechénion a hanhue, ha huguenaudet ér fond.
Ah, me Salvér ! mar examinet hemb truhé me œvreu mat, ar betra en hum fiein-me ? Allas ! ne mès meit en apparance a œvreu mat, rac ne éellan quet laret en e mès int groeit guet un intantion vat ha santel, guet ur garanté tuem ha tinér, a éellehai reign ur bris hac ur mérit benac dehai : pet œvre mat groeit dré gustume, dré vanité, eit pligein d’en dut, eit bout mêlet.
