Drenv ar mene, goustadig
An heol a ziskenne,
|
|
Bis
|
War an uhelan bodig,
Ti re li la, ti re li la, ti re li la la la,
War an uhelan bodig
An tad-moualc’h a gane.(bis)
En e vouez e seblante
Ruilhal perlez dispar,
A gouee, gant karante,
War sioulder an douar…
« kanomp, kanomp, emeza,
Setu deut ar bleuniou ;
An oabl a ziskeuda
E glazur ar maeziou.
Da zerr-noz ha da vintin,
An heol war ar spern-gwenn
A dôl, en eur vousc’hoarzin,
Perlez e gurunen.
An neiz a gren war ar brank,
Ar waz a dint er man…
Kalonou an dud yaouank
A drid hag a richan.
Kanet ’ta youankizou,
C’houi eo hanv Breiz-Izel,
Bleun buezek e mêziou,
Diamant he mantel !
Lezet bleuniou ho kalon
Da zigor d’ar vue,
Evel elestr an andon
Da bok an heol kreizte.
Ho kalon leun a furnez,
Liorz a goantiri,
Elec’h ma voud, hep paouez,
Eun ezen a zudi…
Me garfe, gant an ezen,
Richan enni bepred
Ha diskenn war ar c’hlazen
Da gutuilh eur boked.
Boked flam ha lugernus,
Tensor ar yaouankiz,
Rozennig karantezus,
Lilien leun a c’hliz !
Siouaz, bue eur vleuen
a zo bresk ha dibad,
Mes, o tifilh ar rozen,
E virer ar c’houez vad… »
Al lapousig beg-melen
A difonas e gan ;
Me boanie war ma zelen
Da dapout an diskan.
Tarnijet eo an evnig
E moren ar zerr-noz ;
Me ginnig d’ec’h e zonig
Evel eur boked roz.
