— « Nan, nan, biken ma Breiz-Izel,
Na vi flastret… Kentoc’h mervel ! »
— Kentoc’h mervel ! e laromp hol,
Eget zenti ouz tud diroll ;
Klêv ac’hanomp, Komb den diboel,
Na blegfomp ket… Kentoc’h mervel !
Ne fell ket d’it hon Brezoneg,
Ni, na c’houllomp ket da C’halleg !
Kaer ’z po c’hoari, koz difroket,
Gant ar Brezoneg ’vi trec’het !
Ne c’houllez ket hon Seurezed,
Nag hon beleien kennebed ;
En despet d’ez falz-lezenno,
An dud-se ganimp a chomo !
Hon beleien gomzo dalc’hmad
En yez koz o mam hag o zad ;
Mar n’ o faeez, petra ’ra ze ?
Ni hon deus bara evitê !
Sonjal eta ’ra d’it penoz
E tiskari eur yez ken koz ?
Sonjal ’ra d’it eus ar Breizad,
Ober breman eur renead ?
