Zonet, kleier ar Roc’h ha kleier Landreger,
Zonet ar c’hlaz :
Eur barz a zo maro, du-hont, ’raok e amzer,
’N kreiz ar Gær-Vraz.
Zonet, kleier Plouyel ha kleier Zant-Erwan,
Uz d’an diou ster ;
Gant moueziou glac’haruz, kleier, klemmet hor foan,
War vez, en ker.
Merc’hedigou yaouank, displeget ho koeffou,
Ha c’houi, groage,
’N em vantellet en du, rak herie ’zo kanvou,
En gwirione.
O nag a garantez en efoa, ’n e galon,
Evidoc’h-u !
Hag evit bro ar bruk, an dero, ar gomon
Hag an itu !
Kerzet ’ta goustadik ha zïoul, me ho ped,
’Hed an hinchou :
Biken, ma c’hoarezed, da Gellien na zougfed
Re a ganvou.
