Pajenn:Berthou - Dre an delen hag ar c horn-boud.djvu/18

Eus Wikimammenn
Sauter à la navigation Sauter à la recherche
Gwiriekaet eo bet ar bajenn-mañ
— 14 —



O gwasa amzer ’zo arru !
Glao hag avel, hag a bep tu,
Bemdeiz, en draouien ha war grec’h
Hag herie gwasoc’h evit dec’h.


Enep d’an amzer en kounnar,
Ar paour kez labourer douar,
’Dalek ar beure ’zo bepred
O plomma ar parkou d’an ed.

Mez re-all, ’dleer klemm ive,
En riskl a c’hone o buhe,
En eur vagik branskedilhet
War ar môr dôn dishualet.

Ar re-ze ’zo dalc’h-mad dirag
Ar maro euzuz en o bag :
Ar vag a strons hag a vigour
War lein hag en kleuz an erv dour.

Na oar den petore buhe
An euz an dud a vôr du-ze,
Er pellder, en-kreiz ar stourmou,
Labourerien ar gwagennou.

O c’houi ’n ho kwele tom, en noz,
Goud ouzoc’h pegoulz ha penôz
Ha pelec’h er môr e varvo
Martoloded kez euz hor bro ?