Pajenn:Berthou - Dre an delen hag ar c horn-boud.djvu/130

Eus Wikimammenn
Kadarnaet eo bet ar bajenn-mañ
— 126 —



O ma breudeur ! savet ho tâl !
N’eo ket warc’hoaz : herie, raktal,
’Dleomp troc’ha hon hualou
Ha sevel uhel hor zellou.

Kabestr ebed ! Breiz diere !
Foei d’ar Gallo hep trugare !
Mestr ebed ken war an douar :
An heol evidomp holl a bar.

Kabestr ebed a-berz Bro-C’hall !
Mestrez na mestr ken nebeut all !
D’imp ni eo da zibab eun den
Mar dle unan warnomp-ni ren.

Hag ar gwaz-ze ’dleo bea
Deuz hor gwad-ni, deuz ar gwella !
Breiz d’ar Vreiziz ! D’eze ar vro
Strujusaet gand re varo !

O c’houezen, o eskern, o gwad
A ro sabr d’ar gwe ha d’an had :
Chomomp staget ouz an douar
A welaz o joa, o glac’har.

Anna ’zimezaz d’ar Roue
— Daoust hag hi ’rafe c’hoaz herie ? —
Hogen nag herie na gwechall
N’omp bet dimezet da Vro-C’hall.