Ha ! Ha ! Ha ! Ha !
Alleluia !
Damb ni enta,
Tré men dé hoah noz ér hoèdeu,
Ha ! Ha ! Ha ! Ha !
Alleluia !
Damb ni enta
De gas d’er sant é relégeu !
Frrrr…t ! Mont e hrant kuit get er sah-relègeu.
Chetu mé dijabet doh er relégeu-sé !
Sèh diaul ! Pouizein e hrent èl plom ar men diskoé !
Nag er mestr ?… Mal bras é elkent en dizoarein.
En ur huchal aben d’er ménhir.
Er mestr ! Er mestr !… Nitra ! Rekis e vou toullein.
É ha de skoein un taul-piget : un tarh-gurun er lak
de déh en ur vleijal.
Ha ! Ha ! Ha ! Ha !
N’em es chet bet nameit goulen
Get mem bah, glasteur get er jol,
Un tarh-gurun, ur vrogonen,
Chetu skontet ené Kristol !
Eit gouni mé-memb en trezol
N’em es chet mui meit dont de ben.
A feutein d’er Blei-Garù é ben.
Blei-Garù, ohé, ohé !
Deit ta, deit ta !
Diragoh ne grénein ket mé,
Tré ma vou genein er vah-ma.
