Adlennet eo bet ar bajenn-mañ
LODEN VII
――
――
En Aviél. — Rah en dud e zèbras oa goalh… — Goudé bout golhet treid en apostoled, Jésus e zei endro doh taul ; ean e gemérou bara, er benigou, en torrou a dammeu hag e rei peb unan é dam d’en apostoled, en ur laret dehé : « Keméret ha dèbret : en dra-men e zou me horv… »
A viskoah Jésus e hanaùé er ré n’ou devehé ket kredet énnon ; ean e houié più en devehé ean guerhet : « Nem es chet hou choéjet deuzek ? Ha unan anoh e zou un diaul… »
Adal nezé mar a unan en dilézas… Kalet é kavent kredein é gonzeu : « Più e hel ou cheleuet ? »
————
Épad er loden-ma, en hoari e zou groeit én ur léh distro, étal Bethsaïda-Julias.
————
Er ré e hoari :
SIMON-PIÈR, IEHANN, en apostoled aral, JÉSUS, BENGABER, BENDÉKAR, ABDIAS, AMRI, AZARIAS, HÉREM, SÉMÉI, ABIU, BAANA, hé hroèdur, ur pautrik, JUDAS, ER BOBL, ER GANNERION…
SIMON-PIÈR
Sellet er boblad tud e zou doh hun héli,
Rabbi.
THOMAS
En hoand e zèbr ou haloneu gouli
Ha tuchant é koéhou arnehé en noz du.
