Ho ! tevet, ma bugaligo,
Ar Werc’hez sakr ho tiwallo !
Ma merourien, na welet ket ;
Tud diwar mez, gouzout a red,
Pa ve hao ann ed, ve medet ;
Pa zeu ann oad mervel zo red !
Tevet, tud vad diwar ar mez,
Tevet, peorien keaz ma farrez ;
’Vel em euz bet sonj ac’hanoc’h,
Ma fotred defint sonj ouz hoc’h.
Evel-d-oun-me hi ho karo,
Hag ober a rint mad hor bro.
Na welet ket, kristenien vad.
Ni ’n em gavo ’benn eur boutad ! —
D’ar iou vintin, otrou Karne
Tont deuz ar fest noz, c’houlenne,
O tont d’ar ger, war he varc’h gwenn,
Bordet he jupen penn-da-benn,
He jupen voulouz ru glaou-tan
Bordet penn-da-benn gand arc’hant ;
D’ar iou vintin, otrou Karne
O tont endro a c’houlenne :
— Daoust perag, va zuchentiled,
Ne ked deut d’ar fest re Nevet ?
Daoust perag, d’i-me levered,
Pe oant bet pedet da zonet ?
