Ann aotrou Bran a c’houlennaz
Gand ar gedour, da greiz-teiz c’hoaz :
— Gedour, gedour, d’in livirit
Lestr e-bed o tont na welit ?
— Otrou marc’hek, na welann tra
Nemed mor-ezned o nija. —
Ann otrou Bran a c’houlennaz
Gand ar gedour da bardaez c’hoaz.
— Gedour, gedour, d’in livirit
Lestr e-bed o tont na welit ? —
Ar gedour-gaou, pa he glevaz,
C’hoarzin-droug out han a reaz :
— Eul lestr a welann-me pell-pell,
Hag hen foetet gand ann avel.
— Na pez’ arouez ? livirit krenn !
Daoust eo hi du, daoust eo hi gwenn ?
— Otrou marc’hek, ’vel ma welann,
Du eo, m’entoue ruz-glaou-tan ! —
Ar marc’hek keaz, pa ’n deuz klevet,
Na mui na ken n’euz lavaret ;
Distroi a reaz he zremm c’hlaz,
Ha gand ann derzien a grenaz.
Hag ann itron a c’houlenne
Gand ar geriz pa zouare.
— Petra nevez a zo ama
Pa glevann ar c’hleier tinsa ? —