Pajenn:Barzaz Breiz 4e edition 1846 vol 1.djvu/148

Eus Wikimammenn
Sauter à la navigation Sauter à la recherche
Gwiriekaet eo bet ar bajenn-mañ



III


AOTROU NANN HAG AR GORRIGAN.


(Ies Leon.)


Ann aotrou Nann hag he briet
Iaouankik-flamm oent dimezet,
Iaouankik-flamm dispartiet.

Ann itronn e deuz ganet dec’h
Daou vugel ker kaer hag ann erc’h ;
Eunn a zo paotr, ann all zo merc’h.

— Petra c’houl ho kalon a vad,
P’ec’h euz ganet eur mab d’he dad ?
Livirit, m’her rei d’hoc’h timat :

Kik kevelek a stank ann dias,
Pe kik karo ar forest c’hlaz ?

— Kik karo eo a gaffenn mad ;
Hogen poan vezo mont d’ar c’hoad. —

Ann aotrou Nann pa he c’hlevaz.
Enn he c’hoaf dero a grogaz.

Ha war he varc’h du a lammaz,
Ha d’ar forest c’hlaz ez eas.

War lez ar c’hoad pa oa digouet,
Eunn heizez wenn en deuz gwelet ;

Hag hen mont buhan war he zro
Ken grene ’nn douar dindan ho ;

Hag hen mont war he lerc’h raktal
Ken rede ann dour diouc’h he dal.

Ha diouc’h he varc’h a beb gostez,
Ken a zeuaz ann abardaez ;