Gwir, eo ma mamm, pez ’m euz klevet ?
Ha da Jaouioz kouz onn gwerzet ?
— Ma merc’hik paour, ne ouzonn ket ;
Digant ho tad her goulennet.
— Ma zadik, d’in-me leveret,
Ha da Loeiz Jaouioz onn gwerzet ?
— Ma merc’hik ker, ne ouzonn ket ;
Digand ho preur her goulennet.
— Ma breur Lannik, d’in leveret,
Ha d’ann otrou-ze m’onn gwerzet ?
— Ia! d’ar baron c’hui zo gwerzet,
Ha mont kuit timad a zo red ;
Ha mont kuit heb-dale zo red ;
Ho kwerz a zo digemeret :
Hanter kant skoed enn arc’hant gwenn,
Ha kemed-all enn aour melen.
— Ma mammik, d’in-me leveret,
Pe re dillad a vo gwisket ?
Va brouz ru, pe va brouz gloan wenn,
Hag e deuz gret va c’hoar Elen ?
Va brouzik wenn, pe va brouz ru
Ha va c’horkennik voulouz du ?
— Gwisket ann dillad a gerfet,
Va merc’h, kement-se na vern ket :
