Pajenn:Ar Yann - Kroaziou Arvor, 1866.djvu/4

Eus Wikimammenn
Sauter à la navigation Sauter à la recherche
Gwiriekaet eo bet ar bajenn-mañ
— 4 —



E berr amzer e oe gwelet
Dre Vreiz kalz a groaziou zavet ;
Distumm e ioa kalz anezho,
Hernot ne ioa ket c’hoaz er vro.

War gaeraad ez eant bemdez,
Stang e ioa ar c’hroaziou nevez ;
Hogen ann houarn, pa darzaz,
A reaz doc’h-tu eur c’hoari vraz.

Gread a oe gant-han morzoliou,
Gread a oe gant-han kalz iennou ;
Morzol ha ien, orz ha kizel
A faoute gerrek Breiz-Izel.

A dro vad ann holl gretourien,
Skoazellet gand ar veleien,
A grigne ar vein a vagad
Hag a zeskaz skeudenni mad.

E pad niver a gantvejou
E savaz enn Arvor kroaziou ;
Hogen dond a eure tud fall
Hag a reaz eur c’hoari all.

Doue a oe selled a dreuz
Hag he groaziou ho doe gwall reuz :
Torred, drasted ha dismantret
Gand ar bec’herien kounnaret.

Ar skeudennou a zibennent,
Ar re varo a heskinent ;
Droug ho devoa kalz euz eur be
Ha marved ind holl koulzkoude.

Truezuz braz e ioa gwelout
Ann traou-ze holl o c’hoarvezout ;
Ha Breiziz ker a hirvoude
Vel ann avel er c’hoz-tie.