« Gwir donezoun euz hon tadou
« Ar gwella eo euz hor madou ;
« Kentoc’h eged he zilezel
« Karfemp ive kerkoulz mervel. »
Na furra respount ! a dra-zur,
Hag a ra d’an oll plijadur.
Plougastelliz, dalc’hit pell braz
Ho karantez evit ar Groaz.
Abenn nebeud, e kalz leac’hiou
C’houi velo diskar ar c’hroaziou ;
Bea zo goad Breizad en ho kreiz,
Mirit ho re, Plougastelliz.
Na kaer eo da C’houel an Oll-Zent,
Pa zon ar c’hleier ho c’han sklent,
Mont d’ober tro ar c’halvar koz,
O c’houlen d’an Anaon repoz !
An dud hag an amzer zoken
Er bed-ma prim braz a dremen ;
Nemedoc’h, Kroaz sakr va Zalver,
A jomm bepred en huelder.
Ped remzi ho peuz-hu gwelet
War zouar Plougastell tremenet
C’houi, va Jezuz, war ar C’halvar,
A dra-zur, c’houi hebken her goar !
