Diskan.
Nann, n’eus ket e Breiz, nann, n’eus ket unan,
Nann, n’eus ket eur sant evel sant Erwan. (2W)
- N’eus ket en Argoad, na mui en Arvor,
Koulz ha sant Erwan ’vit an dud a vor.
- N’eus ket, nann, er vro ’vel ma lavarer,
A vefe ken mat ’vit al labourer.
- N’eus ket kaeroc’h skouer d’an dud a lezen,
Evit sant Erwan, skouer ar veleien.
- Ha d’ar beorien gaez, ha d’an dud a boan,
Nann, n’eus ket gwelloc’h eget sant Erwan.
- N’eus ket eur chapel, e beder enni
Gant mui a galon ’vit er Vinihi.
- Ma fell d’eoc’h an tu da gaout ho mennad,
Pedit sant Erwan, ha pedit ervat.
- Pegen mat pedi, pa vez poan-spered,
E-lec’h ma pedas ar sant binniget !
- Pegen brao pleustri an douar santel,
Bet pleustret gwechall gant Sant Breiz-Izel !
- Eus a Gervarzin, stok d’ar Vinihi,
Ez oa genidik Erwan Helouri.
- Eno e c’hanas eun devez hon Sant,
Er bloaz daouzek kant tri hag hanter-kant.
- E-pad e vuhez eur skouer ’vit an holl,
Bevomp eveltan, n’aimp ket da goll.
- D’e hanter-kant vloaz e varvas neuze,
Hag a-denn-askell, d’an Nenv, e ene.
- N’en deus ket e Breiz, eun iliz ken kaèr
Hag e Iliz-Veur e kêr Landreger.
- Evit sant Tual, hon tad binniget,
Dre urz sant Erwan ez eo bet savet.
- Goude e varo e gorf archedet,
En e Iliz-Veur a voe douaret.
- Eur bobl-tud, bemdez, adalek neuze,
’Zeuas war e vez da bedi Doue.
- N’eus bez, evit gwir, en defe gwelet
Burzud war vurzud ken kaer c’hoarvezet.
- Yann V, dug a Vreiz, ’vit e enori
’gaeraas e vez d’Erwan Helouri.
- Ar bez dismantret ’kerz an Dispac’h Vras,
’Zo bet adsavet kaeroc’h ’get biskoaz.
- Sant Erwan e Breiz dre-holl zo brudet
E Treger, Leon, Kerne ha Gwened.
- Ha gant pep rannvro, ’barz ar bez nevez,
Lakaet he maen, gant joa, levenez.
- Ma n’eus ket eur sant evel sant Erwan,
Kaeroc’h ’get e vez, nann, n’eus ket unan.
- E miz Mae bep bloaz ’vez eur pardon Kaer,
Pardon sant Erwan e kêr Landreger.
- Neb a ya da Rom ar Ger-Veur gristen,
War bez Per ha Paol lavar eur bedenn.
- Plijout d’hon Sant bras neb a fell d’ezan,
A dle war e vez mont da zaoulina(n).
- Eomp, kristenien, betek Landreger,
Ha ne gollimp ket, sur mat, hon amzer.
- Hag eur wech m’hon bo gant kalon pedet,
A-berz sant Erwan e vimp selaouet.
- Bepred, da c’hortoz, pedomp sant Erwan,
E pep lec’h, dalc’hmat ha kuit a ehan.
- Evel hon Tadou, int, tud a gredenn,
Lavaromp d’ezan ’n eur gaer a bedenn :
- Aotrou sant Erwan patron Breiz-Izel,
Beza treitour d’eoc’h !… nann, kentoc’h mervel !
|