Miz mae

Eus Wikimammenn
Sauter à la navigation Sauter à la recherche
Moulerez Sant-Gwilherm, 1909  (p. 42-44)



MIZ MAE
————


Les partitions musicales sont temporairement désactivées.


Ar gouanv kri ’zo tremenet,
Ac’han da vla ’vo ken gwelet
Ar rew gwen-kan, war an douar,
O lintri ken brao gant al loar.

Deut eo miz mae, miz a weler
O tispakan bleunio te ner,
Miz dudius, ma hadklewer
Kan ha richan ’leiz ar girjer.

Dindan lagad an heol lintrus,
Pep tra hadkav, o tra zouezus !
Bue, kened, liou ha c’houez-vat,
E keit ma kan an evn dalc’hmad.


Ya, kanan ’ra, a-hed an de,
Ha fred gantan, e poagn ive ;
En beg ar gwe, hag er c’hleuio
Yan-gren ’darre ’glasko nezio.

E-touez ar yeot, er prajeier,
Bleun o sevel o fen seder,
Du-man, du-hont, boudenno-spern
Gant o c’houez-vat, ha bleun a-vern.

Na kaer ive, er parkeier,
Gwelet an ed, ’vel yeot tener,
Gant an awel dalc’hmat hijet,
Rodellet ha dirodellet !

Diouz ar beure, eur c’hlizen wen
Kouet eus an nenv, a stereden
War ar yeot ha war an delio,
’Keit ’pign an heol ’kreiz an oablo.

Ha ’kreiz an de e skuilh tomder
Gant kement a nerz ma weler
An trevado holl o kaerât
Hag o kreski ’bep tol-lagad.

An hencho-don, fall er gouan,
’Zo, tam-ha-tam, deut da zec’han ;
Gant o sioulder e vo breman
Disheol ’darre, epad an hanv.

’Hed an hencho e vo gwelet
Denved bihan newe-c’hanet,
Tost d’an tïe e vo klewet
Sklok ar yar goz gant he evned.

Hag eus tourio ar paroujo
Mouez ar c’hleier breman ’grogo
Da c’hervel tud d’ar pardonio,
Klozet ’boe eun nebeut mizio.


C’hoaz e sonont, bep abarde,
Ewit bodan, e-pad miz mae,
Ar gristenien ’dro da ôter
Ar Werc’hez Vari, o Mam ger.

Miz mae, miz an dudiusan,
Eus an holl vizio ar c’haeran,
’Zo dibabet ’n askont da ze
Ewit enori Mam Doue.


————