I
Deus, mabig bihan, da velet
An holl draou gaer ’zo ’bars ar bed.
DISKAN
De mad d’it, o ma mabig, ma mabig,
Bue vad d’it, ma mabig, la la.
Sell ouz an heol, ouz ar stered,
O strinka sklerijen ha sked.
Deus da zellet ouz ar mor bras,
Ouz ar stêriou, ouz an oabl glas.
Sell dre holl nag a goantiri,
Kaniri flour ha bokidi.
Bokidi ru, bokidi gwen,
Re c’hlas, re vriz ha re velen.
Klev, ma mabig, mouejou koant koant,
Al lapoused o kana drant.
Loned munut ha loned bras…
Digor da lagadigou c’hlas.
II
Penôs, paour kezig, koulskoude,
Penôs rei digemer d’it-te ?
Paour out, ha noaz evel eur ran,
Na feus na mezer na lian ;
Nag aour, na kennebeut arc’hant,
Netra na feus d’it da-unan.
Evit holl vad, poan hag enkrez,
D’az mam, d’az tad e tigasez.
III
Paour out, evit gwir, ma mabik,
Da ine, ’vat, a zo pinvik.
Pur e da ine, pur ka koant,
Gwalc’het gant dour ar vadeiant.
Doue, da grouer ha da dad,
’Neus evidout eul loden vad.
Rouantelez ar Baradoz,
Eleiz a c’hrasou da c’hortoz.
An Iliz vago da ine
Gant lez nerzus, gant gras Doue.
De mad d’it, o ma mabig, ma mabig,
Bue vad d’it, ma mabig, la la.
