Eun dispac’h vraz oa bet en Breiz-Izel hon Bro :
Tud fall, mouget gant-e ar fe ’n o c’halono,
A nefoa fellet d’ê ober d’hon c’henvroïz
Stourm eneb da Zoue hag eneb d’e Iliz ;
Hag en hon Breiz, siouaz ! — truez eo hen laret,
Kalz d’ar varmouzien-ze a oa bet ’n em werzet.
En amzer-ze, amzer a oa meurbed spontuz,
— Zonjal enn-i hirie a zo d’in gwell-boaniuz !
Na vije klevet ken en ker hag er mezio
Nemet tud digristen o sevel o mouezio
Da gana zonio lik, ha da lakat da ren
Eur fals kreden bennag e-barz kalon an den.
Gizio hon zadou koz hag o iez binniget
Gand an dispac’herien a oa bet distrujet :
Skrivagnerien, gwerzet o vluen da dud gall,
A skrive evit-ê levrio disleal,
Livet enn-ê gevier a-eneb d’hon zent koz,
Rag war ar zent, dreist-holl, e tolent o malloz.
Chomet oa, koulskoude, c’hoaz eun denik bennag
Ouz ar gizio, ar iez, ar zent ha Doue stag,
Hag a laboure stard evid harz da goueza
Ar pez a vad a oa lezet c’hoaz en e za,
Mez ze a ao nebeut ’mesk ar fall o tiroll,
Ha Breiz-Izel, siouaz ! a renkas mont da goll…
— o —
Breiziz, ma breudeur ker, mar ’peuz c’hoant da vired
Na deufe an hunvre am eus d’ec’h displeget
Da vean gwir eun de, hebdale marteze,
Zevet holl en ho sav da stourm evid Doue,
Ho Kustumo, ho iez, hag holl zent koz ho Pro ;
Anez-ze, em euz aon, hon Breiz ’ia d’ar maro…
Miz Gouelen 1898.
An Tremener.
