Me oar eun ti toet en glaz,
Dirag eur c’hoat kistin ha fo :
Deuz ar gambr ’weler ar mor braz,
Tourio, kestel, hag ilizo.
Eno ’meuz bet evurusdet
E-kichen ma mamm ha ma zad,
Ma breudeur ha ma c’hoarezet,
Ha breman em euz kalonad.
Ma Breiz-Izel em euz kuiteet
Bean zo tri bla pe war-dro ;
Da goste Pariz ec’h on et
Da zervji ar Franz, ma bro.
Aboue, evel an dour a ruilh
Em euz baleet war dre-holl,
Hag em euz bet kalz a drubuilh
O vevan e-mesk tud diroll.
Gwech-all, d’ar zul ha d’ar gouelio,
’C’h en da glevet an oferen ;
Hag aliez ar gouspero
A c’heulien ive penn-da-benn.
Aman, d’ar zul ’vel d’ar pemde
E ve red mad labourat stard,
Heb gallout zonjal en ine…
Hag hen ’n euz ine eur zoudard ?…
— ’N euz ket, herve lavare d’in
Eun devez eur mestr digristen.
En despet da ze, me gav kri
Bevan ’vel eun den hep kreden.
Pegoulz ’ta ’teuio an amzer
Ma c’hellin, pell deuz an dud fall,
Daoulinan dirag an aoter
’N em iliz-parouz ’vel gwech-all ?
Pegoulz e c’hellin me komz c’hoaz,
Heb aoun ebed, ar brezonek,
Iez ar zent koz hag a varvaz
Evid o fe, ken kalonek ?
Pegoulz ’c’hellin-me, gant ma zad,
El lanneier hag er parko,
’N em lakat c’hoaz da labourat,
Zeder, dindan bolz an Nenvo ?
Zerviji ar Vro, me hen goar,
D’eun den yaouank ’zo enoruz :
An hini labour an douar
D'e vro ive ’zo talvouduz.
E miz Gwengolo 1898.
An Tremener.
