|
Kleier an hanter-noz a vrall ’us d’ar mêziou ;
Deut eo noz Nedeleg, noz an donezonou ;
War ar chiminaliou, en oaledou breizad,
’C’h eo renket, gant evez, an holl voteier koad ;
Hag e kraou Betleem, ’n e veneiou didrouz,
Jezuz zo a-neve astennet war ar plouz.
Evit hen digemer, an erc’h stank ha sioulik
’N eus gwisket d’an douar eur vantel herminik,
’Vel pa vije ar zent, an êle, hep repoz,
O tifilh war e hent roz gwenn ar Baradoz…
Eus pevar c’horn ar bed, krenvoc’h ’vit trouz ar mor,
E kinniger d’Ezan gloar, doujans hag enor.
Ha Jezuz evurus a vousc’hoarz ouz e Vamm ;
Ha Mari, gant dousder, a bleg he fenn dinam
Da c’houl ’vit pephini, gant Mestr pep donezon,
Dêrou mad ha grasou herve c’hoant e galon.
Souden, Jezuz a drid, Jezuz a zav e benn,
Astenn a ra d’e Vamm e zaouarnigou gwenn :
— « O Mamm, chilaouet ’ta, ne glevet ket du-ze
« Moueziou dous ha tener ’vel êzen ar beure,
« Moueziou drant hag a zav eus bro an dero glas,
« Enezen a zudi, kelc’hiet gant ar mor bras ?
« O yez koz a zo flour, o fe nerzus ha stard ;
« O zadou da Zoue biskoaz n’int bet trubard ;
« Ha hano o broïg a zo dous ’vel ar mel…
« Glevet ket nouellou bugale Breiz-Izel ?
« Niverus ha dinam dirak ma c’hraouïg plouz,
« Me o gwel daoulinet en o iliz parouz ;
« Ma c’halon d’o feden a drid ebarz ma c’hreiz…
« Petra a rofen-me da vugaligou Breiz ? »
— « Jezuz, eme ar Vamm, eveldout me a gar
« Bugaligou Arvor hag o broïg dispar ;
« Ma bennoz a roan d’ar Vreuriez santel
« An eus o dastumet tro-war-dro d’he baniel ;
« Ar vreuriez vad-se an eus ezom eur vouez
« Da c’hervel he mibien, d’o c’helen hep paouez,
« Eur vouez dous ha nerzus ’vel eun delen breizad…
« Ro d’eze kement-se evit o dêrou mad. »
Ar Mabig a zentas ; setu perak hirie
Hoc’h eus, bugale ger, eur gelaouen neve.
Grêt d’ei digemer mad. Ra vo, en pep ti Breiz,
Ar bann-heol a strinko dudi ha joa a-leiz.
Roet d’imp gant Jezuz ha hanvet Arvorig,
Hi vo arouez ar fe en bro an Herminig !
KOULMIG ARVOR
|
