Buhez ar Sent/1894/Kristina

Eus Wikimammenn
Sauter à la navigation Sauter à la recherche
◄   Apolliner Kristina Jakez   ►


ar pevare var’nn ugent a viz gouere


SANTEZ KRISTINA, GUERC’HEZ HA MERZEREZ
————



Kristina a ioa ganet e kear Tur enn Toskaan, eur gear hag a zo bet beuzet abaoue gant dour eul lenn vraz a ioa e kichen. He zad a ioa bet hanvet da c’houarner er gear-ze gant ann impalaer Dioklesian, hag en doa eur gounnar direiz ouz ar gristenien. Hogen, Kristina a ioa souezet o velet joa ha modestiar re-ma pa vezent digaset dirak he zad, ha lakeat goudeze etre daouarn ar vourrevien. Goulenn a reaz petra oa ho relijion, ha dre chans, pe, evit lavaret guell, dre eunn taol euz a Brovidans Doue, e kavaz tud d’he c’helenn var guirioneziou ar feiz. Pa oue desket aoualc’h, e oue badezet e kuz, ha kerkent e tiskouezaz ann heuz e doa ouz ann idolou enn eur derri ar re a ioa enn he c’hear. Ne oa c’hoaz nemed dek vloaz d’ann ampoent.

He zad a ieaz enn egar pa glevaz ann dra-ze. « — Va merc’h, emezhan, ha guir e ve eo c’houi oc’h euz bruzunet hon doueou ? » « — Va zad, eme Gristina, n’ez euz nemed eunn Doue. Hoc’h idolou ne d-int nemed koz patromiou ha ne chellont rei sikour ebed d’ehoc’h. » Ar gouarner a goumprenaz dioc’htu oa kristenez he verc’h hag oa dija stard enn he c’hredenn evel ar gristenien all. Raktal e c’halvaz ar vourrevien, hag e roaz urs d’ezho da skourjeza Kristina ha d’he zeuler goudeze enn eur prizoun striz ha tenval.

Mes, o velet ne c’helle ket dont a benn anezhi, e lavaraz he staga oc’h eur rod, ha lakaat ar rod-ma da drei azioc’h eunn tan braz. Ann tan ne reaz drouk ebed d’ar Zantez ; mes ar mirakl-se, e leac’h digeri he zaoulagad d’he zad, ne zervichaz nemed da greski he zallentez. Kement a gounnar a ieaz ennhan ma’z oa henveloc’h ouz eunn anenval pennfollet eged oc’h eunn den. Antronoz

e oue kavet maro enn he vele.

Goulskoude Kristina a oue dalc’het ato er prizoun, hag a benn eunn nebeut deveziou goude, ar gouarner nevez a ioa bet hanvet e plas he zad a reaz he c’has da dempl Apollon evit ober d’ezhi kinnig ezanz d’ann doue faoz-se. Mes, kerkent ha ma erruaz eno, ann idol a gouezaz d’ann douar hag a oue bruzunet e mil damm.

Ar burzud-ma a c’hounezaz eur maread paianed d’ar feiz, hag ann dra-ze a lakeaz kaloun ar Zantez da zridal gant ar joa. Etre daou e varvaz ive ar gouarner nevez ; mes ann hini a deuaz enn he blas a oue ker kriz ha ken digernez hag ann daou a ioa bet da ziveza enn he raok. Ordren a eure teuler Kristina enn eur forn c’horet evit he devi ez-veo ; mes Doue a reaz enn he c’henver ar mirakl en doa great guech all e kenver ann tri zen iaouank e fournez Babilon : chom a eure e kreiz ann tan heb kaout drouk ebed.

Neuze ar gouarner aheurtet a lavaraz lakaat anezhi enn eunn toull tenval hag heuzuz, leun a zarpanted hag a aered-viber. Mes ar re-ma a deuaz raktal da veza don, ha ne rejont nemed c’hoari enn dro d’ezhi evel a reant guech all enn dro da Adam ha da Eva araok ho fec’hed. Epad ann amzer-ze, ar Zantez ne ehane da gana meuleudiou ann Aotrou Doue. Ar gouarner, o sonjal edo o klask ober goab anezhan, a reaz trouc’ha he zeod d’ezhi hag he staga ouz eur peul el leac’h ina oue treuzet he c’horf a daoliou bir. Evelse e roaz erfin he ene da Zoue d’ar 24 a viz gouere enn unan euz ar bloaveziou diveza euz ann trede kanved goude donedigez hor Zalver.


SONJIT ERVAD

Santez Kristina a zo bet bourrevet da genta dre urs he zad. Enn hon amzer-ni ez euz c’hoaz bugale hag o deuz ive kalz da c’houzanv euz a berz ho zud. Mar d-eo abalamour d’ho relijion pe d’ho devosion e reer goall vuez d’ezho evel a reat d’ar zantez-ma, ar vugale-ze a dle en em istimout euruz eveldhi ; rak eunn devez a zeui o devezo ive eur gurunenn gaer er baradoz. Mes red e d’ezho evit kement-se dougen bepred ho c’hroaz gant pasianted, evel Jezuz-Krist hag ar Zent ha beza ato leun a respet, a zentidigez hag a garantez evit ho zud enn

despet d’ar boan o deuz gantho.