|
Hon tad zo war ar mor, ema e beg ar Raz ;
Breur, ken a zistroio, pedomp !
He vag a zo bihan, hag ar mor a zo braz ;
Aotrou, bezet truez ouz-omp !
Mirit, Aotrou, bag ’r pesketer
Dioc’h kerrek ha dioc’h gwall amzer,
Mirit ho zad da zaou vugel
Rankfe hep-d-han siouaz ! mervel.
— « Sell, breurik, eunn dra-bennag wenn,
» E rez ar mor, pell a welann … »
— « E rez ar mor, c’hoar, o tremen,
» Eul labouz eo hanvet gwelan. »
« Gwelan, gwelan, pe-leac’h ema
» ’R pesketer, tad Job ha Tina ? »
Hon tad zo war ar mor, ema e beg ar Raz ;
Breur, ken a zistroio, pedomp !
He vag a zo bihan, hag ar mor a zo braz ;
Aotrou, bezet truez ouz-omp !
Maro hor mamm, da gloc’h ann noz
Ez eaz a Vreiz d’ar Baradoz…
Hag abaoe nemet hon tad,
Den ne zec’haz hon daoulagad.
— « Breur, sell ! breur, setu he c’hwell !
» M’he gwel o tont, dreist ar garrek… »
— « Dreist ar garrek gant ann avel,
» C’hoar, eur goabrenn zo o redek. »
« Koabrenn, koabrenn, pe-leac’h ema
» ’R pesketer, tad Job ha Tina ? »
Hon tad zo war ar mor, ema e beg ar Raz ;
Breur, ken a zistroio, pedomp !
He vag a zo bihan, hag ar mor a zo braz ;
Aotrou, bezet truez ouz-omp !
Ni hor beuz evit holl vadou
Bagik hon tad, he rouejou,
Hag eunn ti-zoul war ann teven…
Digor ann nor, ann oaled ien !
— « Breur, sell c’hoaz, rak m’em beuz gwelet
Eunn dra-bennag deut war ann treaz… »
— « Ne d-eo netra ; eur roenv torret,
» roenv ’r pesketer, va c’hoarik keaz ! »
« Roenvik torret, pe-leac’h ema
» ’R pesketer, tad Job ha Tina ?… »
Hon tad zo war ar mor, ema e beg ar Raz ;
Breur, ken a zistroio, pedomp !
He vag a zo bihan, hag ar mor a zo braz,
Aotrou, bezet truez ouz-omp !
(Propriéte.)
|
