Barzhaz Breizh/1846/Ann eostik

Eus Wikimammenn
Sauter à la navigation Sauter à la recherche

Oberennoù damheñvel pe handelvoù all zo ivez, gwelout An Eostig.



XX


ANN EOSTIK.


(Ies Leon.)


Greg iaouang a Zant-Malo, deac’h,
D’he frenestr a oele, d’ann neac’h :

— Sioaz ! sioaz ! me zo tizet !
Va eostik paour a zo lazet !

— Livirit d’in va greg nevez,
Perak ’ta savit kelliez,

Kelliez diouz va c’hostez-me,
E kreiz ann noz, diouz ho kwele,

Diskabel-kaer ha diarc’henn,
Perak ’ta savit evelhenn ?

— Mar zavann, den ker, evel-se,
E kreiz ann noz, diouz va gwele,

Da eo gan-in, setu, gwelet
Al listri braz mont ha donet.

— N’ed eo ket, vad, evid eul lestr,
Az it kelliez d’ar prenestr ;

N’ed eo ked evid al listri,
Nag evid daou nag evit tri ;

N’ed eo ked evid ho gwelet,
Ken-nebeud al loar, ar stered.

Va itronez, d’in livirit,
Da berak bep noz e savit ?


— Sevel a rann da vont da zell
Ouz va bugel enn he gavel.

— N’ed eo ket ken evit sellet,
Sellet ouz eur bugel kousket ;

N’ed eo ket gevier a fell d’e.
Da berak savit evelse ?

— Va denik koz, ma na derez,
Me lavaro ar wirionez :

Eunn eostig a glevann bep noz,
Er jardin war eur bodik-roz ;

Eunn eostik bep noz a glevann ;
Ken ge e kan, ken dous e kan !

Ken dous e kan, ker kaer, ken flour,
Bep noz, bep noz, pa zioul ar mour ! —

Ann aotrou koz dal’m’ he c’hlevaz,
Enn he galoun a brederiaz ;

Ann aotrou koz dalm’ he c’hlevaz,
Enn he galoun a lavaraz :

— Pe mar ma gwir, pe ma ne ket,
Ann eostig a vezo paket ! —

Antronoz-beure, pa zavaz,
Da gaout ar jardinour a eaz.

— Jardinour mad, sentit ouz-in ;
Eunn dra zo a ra glac’har d’in :

E’r garz a zo eunn eostik-noz
Ne ra nemet kana enn noz ;

Hed ann noz ne ra met kana,
Ken e ma ounn dihunet gant-ha.


Mar ’ma paket fenoz gan-id,
Eur gwenneg aour a roinn-me d’id. —

Ar jardinour pa’n deuz klevet ;
Eunn ulmenig en deuz leket,

Hag ann eostig en deuz paket,
Ma d’he aotrou neuz hen kaset.

Hag ann aotrou, pa hen dalc’haz,
Awalc’h he galoun a c’hoarzaz,

Hag he vougaz, hag he daolaz,
War barlen wenn ann itron geaz.

— Dalit, dalit, va greg iaouank ;
Setu aman hoc’h eostik koant :

Me ’m euz hen paket evid hoc’h ;
Me chans, va dous, e plijo d’hoc’h. —

He den iaouank dal’ ma klevaz,
Gand glac’har vraz a lavaraz :

— Setu ma dous ha me tizet ;
Ne hallfomp mui en em welet,

Da sklerder loar, d’ar prenester,
’Vel ma oamp boazet da ober. —


————