Ar ster

Eus Wikimammenn
Aller à la navigation Aller à la recherche


AR STER
————


Beajour, aze ’n es koaze ;
Mammen ar ster a zo aze,
E-kichen ar mene huel,
’Mesk ar vein, e-troad ar roc’hel.

Buhan-buhan e strink an dour,
’N eur hiboudal gant eur vouez flour,
Flour evel kan al laboused
E-mesk delio ar gwe kuzet.

Zell out-i, du-hont er prajo,
O redek ’mesk ar bokejo,
Ha hi ken plean evel eul lenn,
Pa ve koet an avel a-grenn.

Sklear eo evel an arc’hant glann,
Ha, ’pad an de, an heol splann,
Ar yeot glaz, hag ar gwezigo,
A wel enn-i o skeudenno.

Pa goe an noz war an douar,
Ar stered skeduz hag al loar,
Evel e-barz eur mellezour
En em zell laouen ’barz an dour.

— o —

Treuzet gant-i ar prajeier,
Ec’h arri ar ster en eur ger ;
Rak-tal, sethu-hi strafilhet,
Ha kollet gant-i e sklerded.

Kement tra louz o deuz keriz,
Heb mez ebet, o tra iskiz !
Er ster ’ve taolet prim gante-ê
N’he zellet ken, fanket ec’h ê.

Mont a ra bepred gand he hent,
Sioul ha gorrek ’vel diagent,
Mez, me ho ped, stouvet ho fri,
Rak c’houez gwell-fall a zo gant-i.

Deut eo da vean ken tenval
Ken ec’h eo ouz dour-teil hanval :
An heol, al loar hag ar stered
Enn-i na veont ken gwelet.

Evel ma tosta d’ar mor braz,
D’he heuilh e renk strahina c’hoaz,
Aliez meur a gorf maro
Evid kuzan an torfejo.

— o —

Aboue em euz anoudegez,
Er bed-man a distridigez
Em euz gwelet meur a ine
A zo hanval ouz ar ster-ze.

Keit ha ma oant c’hoaz yaouank-flam,
An ineo-ze, ’oa divlam,
Glann evel an erc’h o kouean
War ar mezio, e-kerz ar goan.

An ineo-ze, meurbed kaer,
A oa gwir skeuden o C’hrouer,
Ha skedi ’rent e gwirione,
Evel an heol en e greiz-de.

Eledigo ar Baradoz
Na badent mui ouz o gortoz,
Hag o gervel ’rent ’n o c’hichen
Da veuli Doue da viken.

Siouaz ! dre mac’h int deut en oad,
’C’h int pellaet dimeuz ar vad,
Hag o heuilh skouerio fall ar bed
Ec’h int bet mastaret abred.

Int hag a oa, gwech-all, gwenn-kann,
Ha skeduz ’vel an heol splan,
A zo breman du ha hudur
Evel eun tammik breinadur.

Skeuden o C’hrouer, en eun tol,
Enn-ê ’zo bet diverket holl,
Ha deuz huelder an Nenvo
N’o galv ken an eledigo.

An Tremener.