Nan on ’met eur bugel bihan,
Eur paour kez mesaer denved :
Neubet a dra anavean,
Ha n’am euz ket gwall a spered,
Na ouffen ket displega skler
Nag ar fizik nag ar chimi ;
Ar chiffo gomprennan ket kaer,
Nag ive an astronomi.
— o —
Brema, herve klevan laret,
Er skolio d’ar vugale holl
An treo-ze a ve displeget
N’o ouzon ket… D’in pebez koll !…
Ma zad ha ma mamm a oa paour,
Ha ’daleg an noad a zek vla,
Pa n’am oa nag arc’hant nag aour,
’Meuz renket gonid ma bara.
Dre-ze, er skol n’on ket bet pell :
Goud ’ran a-vec’h lenn ha skrivan,
Niveri eun tamm, waz pe well…
N’eo ket a-walc’h ze ’vid bevan ?
— o —
Pa oan o heuilh ar c’hatekiz,
Ma verson koz a lavare :
« Evid-oc’h ’vo eun dra iskiz
Mar n’anavezet ket Doue… »
Hag aboue, war ar meneio,
Er c’hoajo hag en hencho braz,
El lanneier hag er prajo,
Ha, dreist-holl, en bolz an nenv glaz
En euz klasket Doue dalc’h-mad,
’Vid gwelloc’h hen anavezout :
Dre-holl ’m euz welet e lagad,
Dre-holl ’m euz gwelet e c’halloud.
Sethu aze ma diskamant :
Anveout Doue da gentan.
Kalz a lavar on diskiant :
Pe int pe me eo ar vuran ?
An Tremener.
E miz Eost 1898.
