Ar c’havel goullou

Eus Wikimammenn
Mont d’ar merdeerezh Mont d’ar c’hlask


AR C’HAVEL GOULLOU
————


En bolz an Nenv, an heol a sked,
Hag a zedera krenn ar bed ;
Er yeot, er bokejou, er gwe,
Eman o tridal ar vue.

An evned, pignet war ar skour
A richan o c’hanaouenn flour,
Ha klevet ’vez en er skiltruz,
Evel eur muzik dudiuz.

Pegen brao ê bevan hirie !
Nag ec’h ê laouen an ine !
Dleet a rafe ar Maro
Lezel eun tamm e falc’h garo.

Mez, siouaz ! he lemma a ra.
Sell-han du-hont !… Pelec’h ec’h a ?…
Serret oll ha prenestr ha dor,
’Vid ne gavo neb lec’h digor.

— o —

…Eneb ar Maro hag e falc’h
Ne vez kammed stourmet a-walc’h.
Na prenestr na dor serret kloz
Ne ra souza ar Falc’her koz.

E-kichen eur c’havell goullou,
Eur vamm yaouank a skuill daerou :
He mabig bihan oa enn-an
’Zo bet tennet deuz ar bed-man.

An Ankou, kounnaret spontuz,
Hep selaou klemmou ankeniuz
Ar vammig paour ken glac’haret,
Gant krizder braz ’n-eus hen falc’het.

Hag an heol a delc’h da baran,
Hag an evned da richanan,
An traou en douar da greski,
Hag ar vamm gez da hirvoudi.

— o —

Mamm ankeniet, na ouelet ket :
Ar bugelik ho-peuz kollet
A zo savet war-eûn d’an Nê,
Hag a zo evruz gant Doue.

E-mesk ele ar Baradoz
Eman breman ouz ho kortoz :
Nan euz eno trubuilh ebet,
N’eus ’vit-an ’med evuruzted.

Pa diskennac’h ’barz ar be don,
Ar c’horf-ze ken ker d’ho kalon,
Ar c’hleier ’zonê ’barz an tour
Gant o moueziou ar muian flour.

Hag an Iliz santel, hon mamm,
’Lec’h gouela d’ar bugel divlam,
’Ganê dre c’heno ar belek
Psalmou zeder ha karantek.

Na ouelet ket pelloc’h ;
Sonjet er c’hontrol ’c‘h ê gwelloc’h
Mervel pa ve an ine glann,
Ar spered hag ar galon splann.

’Wecho, dre ma zav er vue,
Ar bugel ’vastar e ine ;
D’e dad, d’e vamm ’c‘hê eun drubuilh,
Hag ober ’ra d’ê gouelan puilh.

Hoc’h hini-c’houi, kempenn ha koant
’N euz miret zae e vadeiant ;
Gant-i c’hê nijet d’an Nenvou,
C’hoarzet ’ta, ’lec’h skuilha daerou.

E miz C’houevrer 1899.
An Tremener.