Ra sternet-c’hui va marc’h, ha va sterner timad :
M’az aimp d’ezhi raktal, da c’hout hag hen hell pad ! —
Pennarger ’c’houlenne demeuz beg ar c’hrenal
Gand ann aotro Gwesklen, ’nn eur digarez farsal :
— Daoust hag hen ’m oc’h-hu deut aman d’eunn abadenn,
Ha-pa ’m oc’h-hu sternet, hag ho tud, evelhenn ?
— D’eunn abadenn omp deut, aotro ar Zaoz, heb gao,
Ne ked da gorolli, da zon ann hini eo ;
Da zon eur goroll d’e-hoc’h ha n’achuo abred ;
Kerkent ha ma vimp skuiz, arnodo ann diaouled. —
Abenn ar c’hentan stok ar voger zo pilet,
Ha tre-beteg ann doun ar ger e deuz krenet ;
Abenn ann eilved stok, dismantret teir zoural,
Ha lazet daou c’hant den ha mui pegement all ;
Abenn ann deirved stok, zo pilet ar perzier,
Hag ar Vretoned tre, ha kemeret ar ger.
Diskarret eo ar ger ; ann douar marret mad ;
Ha kanan ra ann den zo eno oc’h arat :
« Iann ar Zaoz, evit-han da veza ganaz fall,
Na c’houezo war Vreiz tra vezo kerrek Mal ! »
