Daoust d’ar youl he defe d’hen ober, Anjelina n’he deus ket kredet komz d’he breur. Ar c’hosa eo hemañ, an hini en deus kemeret plas an tad. Enoret e vez gant ar vugale evel ma ve bet an tad e-unan. Gouzout a ra moarvat petra en deus da ober. Pa gavo hi tro, e ranko koulskoude Anjelina lakaat ar gomz war Nedig da Wennael… N’int ket end-eeun, evit chom evelse da sellout an eil ouz egile, evel ki ha kas…
Gwelet he deus c’hoaz Anjelina ez eo lent Biel dirazi. Arsa ! Anjelina a zo eun dimezell, evel ma vez ar gemenered[sic] er vro ha muioc’h c’hoaz eget ar re all, rak c’hoar Gwennael a zo eur plac’h yaouank a c’hened dispar gant he bleo melen kordigellet, he daoulagad glas-mor, he dremm gwenn-laez, he bizied mistr, moan hag hir.
P’en deus he gwelet, ar wech kenta, Biel dirazi a zo chomet… abafet. Abaoue ne vez ket ken mezo, a-vec’h ma vez tommet eun tammig dezan d’ar sul abardaez.
Abaoue ivez ez eo tostaet eun tammig ouz Gwennael.
Re all a zo avat ha ne garont ket Gwennael.
Perig Bourdelleg a ra fae warnan. Gwen-
