— Honnez a dalc’h ma c’halon baour,
Ann Anko ra dai d’am sikour
Evid ann anken d’hi starda,
Eur wech ma ve d’ei d’am enkoua !
Evel eur sparl e rod ar c’har
Treuzo houd—spern kalon digar,
Ha mesk lili gwenn hec’h ine
D’ober hi foan chomo noz-de !
Ha r’c’hoarvefe d’in kement all !... —
Diwalled ouz pedenno fall
Rok oe dizec’het ar boud glaz
Ha gwenvet lili ’troad ar groaz,
Troaz hi fenn d’ar plac’h iaouank ;
Goelet am euz, ’vel ruill ar stank.
Ma dousik-koant am boe gwestlet,
Ha d’ann Anko z-eo dimezet ;
E bered hon farouz breman
A gousk hec’h hunik divezan.
