Adlennet eo bet ar bajenn-mañ
109
MARVAILLOU GRAC'H-KOZ
AL LABOUZ BIHAN HAG ANN DEN
« Deuz, labousik, em c’haoued wenn,
» Labousik koant a nij laouen,
» Deuz da zibri greun, kuign ha mel !
» Ar bleunv zo e liou da askel
» A vezo da wele, da neiz.
» Deuz ’ta ! Hep paouez hed ann deiz
» C’helli kana, kousket enn noz :
» Labousik koant, me da c’hortoz. »
Al labouz fur neuze d’ann den
A lavaraz : — « Gwell eo gan-en
» Nijal, kana dre ar c’hoajou,
» Kousket a-zindan ann deliou,
» Sellet enn Env oc’h ar stered
» Bihan ’vel d-oun ha kaer er bed. »
Gwell eo frankiz d’ann diouaskel
Evit eur gaoued leun a vel.
