- TOMAZ
Kustum ar re sot a zo ar c’hiz fall. 'Vit staga eur vuoc’h, pa vez ganti faltaziou, me mont da ziskouez d’it ar c’hiz vat.
Tomaz a ya da gemer eur gorden hag a ra eur c’houlm-red enni.
- TOMAZ
Gwelout a rez ? Eur c’houlm-red a ri d’ar gorden, hag e laki anezi d’ar vuoc’h en-dro d ’he goûg. Seul vui e tenno war ar gorden, seul vui e vezo-hi taget, hag he devezo diaezamant, ken a baouezo tenna, ’benn ar fin.
Rei a ra ar gorden da Gatou.
Komprenet mat ’c’h eus ? La. Bremañ eo poent d’in mont kuit.
Tomaz a ya kuit.
- ELEN, da Gatou.
A bian, petra emaout o c’hortoz ?
- KATOU
Selaouit, Len… Bez’ ez eus eun dra… N’am eus ket kredet lârout d’an Tomaz gant aon e rafe trouz. Ar gorden bet torret gant ar vuoc’h eo an hini nevez bet prenet gantañ e kêr en deiz all.
- ELEN
Perak ivez ’poa kemeret hounnez ?
- KATOU
’Blamour e-touez ar c’herdin koz n’oa hini hir a-walc’h evit ar vuoc’h peuri en hec’h aez.
Katou a ya da gerc’hat ar gorden he deus lezet adreñv an nor.
- KATOU
Ha setu houmañ torret bremañ ! Daou vetrad re
