Pajenn:Malmanche - Ar Baganiz, 1931.djvu/41

41

FANT
Mes, en tu all d’ar mor, n’eus ’met an Inizi ;
hag eno e chom diaoulou
hag a zebr ar vugaligou.

DEL
Eur vro all ’zo, na ouzout anezi…
Sell piz : ne welez tra, ’rez an dremmwel ?

FANT
Ne welan seurt, nemet brumenn vor o sevel ;
ha se n’eo ket eur seblant reiz,
brumenn vor da vare kreisteiz.

DEL
Me ’wel du-hont eun douar kaer
o luc’ha dindan an heol sklaer.
Me ’wel eun tevenn ken gwenn hag an erc’h ;
pelloc’h parkou ed ; ha koadou war-lerc’h.
Me ’wel eur vali hir, enni pikolou gwez ;
a-us d’ar porrastell ez eus eun ardamez.
Me ’wel eul liorz kaer, enni bleuniou e-leiz ;
eur c’hae beuz en he zro, eul leton en he c’hreiz.
Me ’wel eur maner bras kizellet e vuriou,
Mein-glas ’zo war an doenn ha gwer er prenestrou.

FANT
Nag a draou a welez, ha me ne welan tra !

DEL
Tav ’ta. Gortoz. Tud a welan bremañ.
Eun den yaouank ez eus e kambr an douribell
o kimiada e vamm kent evit mont da bell.